नवदिल्ली – रविवासरे भारतं संस्थापनादिनम् आचरति। अस्य भागत्वेन आराष्ट्रं विश्वविद्यालयेषु विशेषकार्यक्रमाणाम् आयोजनाय विश्वविद्यालयानुदानायोगः निरदिशत्। प्राशासनिककार्यालयेषु विद्यालयेषु च गुरुवासरे प्रातः संविधानस्य उपोद्घातं पठितुमपि निरदिशत्। सर्वेषु विद्यालयेषु आधारभूतानि कर्तव्यानि इति विषये कक्ष्यामपि चालयिष्यति। एतत् सूचनाफलके प्रदर्शयिष्यति च।

अनन्तपुरी – मीसिल्स्-रूबल्ला रोगयोः निवारणार्थं दीयमानं सूच्यौषधं प्रदातुं समयपरिधिः डिसम्बर् प्रथमदिनं यावत् दीर्घिता। पूर्वं द्विवारम् एवं दीर्घिता आसीत्। परन्तु सर्वकारस्य लक्ष्यं सफलं न जातमित्यतः निवारकसूच्यौषधप्रदानाय समयपरिधिः पुनरपि दीर्घिता।

नवमासादारभ्य पञ्चदशवर्षं यावत् वयस्काः ७६ लक्षं आर्भकाः राज्ये सन्ति। तेषां सर्वेषां सूच्यौषधदानमासीत् प्राशासनिकं लक्ष्यम्। परन्तु ६१ लक्षम् अर्भकेभ्य एव इतः पर्यन्तम् अौषधं दत्तम्। एतत् लक्ष्यस्य ८३ शतमितमेव।

जेरुसलेम्- इस्रायेल् प्रधानमन्त्री बेञ्चमिन् नेतन्याहू वर्यः भारतसन्दर्शनार्थं सज्जः भवति। चतुर्दिवसीयसन्दर्शनार्थं स जनुवरिमासस्य १४ तमे दिनाङ्के भारतं प्राप्स्यति। भारतप्रधानमन्त्रिणः नरेन्द्रमोदी वर्यस्य इस्रायेल् सन्दर्शनात् परं मासषड्कमतीते सति इस्रायेल् प्रधानमन्त्री भारतसन्दर्शनार्थं यतते।

२००३ तमे वर्षे तदानीन्तनः प्रधानमन्त्री एरियल् षारोण् महाभागः भारतपर्यटनं कृतवानासीत्। ततः १५ वर्षात् परमेव अधुनातनः प्रधानमन्त्री भारतमायाति। १९९२ तमे वर्षे नयतन्त्रबन्धस्थापनात् परं भारतं संदृश्यमानः द्वितीयः प्रधानमन्त्री भवति बेञ्चमिन् नेतन्याहू।

नवदिल्ली – भारतराष्ट्रपतेः औद्योगिकवसतौ राष्ट्रपतिभवने इतःपरं सामान्यजनानामपि सन्दर्शनानुमतिः। अनेन सामान्यजनाः राष्ट्रपतिभवनस्यान्तः प्रवेष्टुं शक्नुवन्ति। प्रतिवारं गुरुवासरादारभ्य रविवासरपर्यन्तं चतुर्षु दिनेषु सन्दर्शनं साध्यं भवति। तदर्थं प्रतिशीर्षं ५०रूप्यकाणां चीटिका स्वीकर्तव्या। बालानां कृते अवमोकः वर्तते। प्रातः ९ वादनतः सायं ५ वादनपर्यन्तं सन्दर्शनं कर्तुं शक्यते। प्रवेशार्थं भारतीयाः प्रतिच्छायायुक्तम् अभिज्ञापत्रं समर्पयेयुः। वैदेशिकानां कृते पारपत्रम् (Passport) आवश्यकम्।

नवदिल्ली – सैबर् स्पेस् इति संगणक-संजालमधिकृत्य द्विदिवसीयं वैश्विकसम्मेलनम् अद्य नवदिल्लयां समारभते। प्रधानमन्त्री श्री नरेन्द्रमोदी एतत्सम्मेलनस्य समुद्घाटनं विधास्यति। सम्मेलनमिदं इदम्प्रथमतया भारते समायोज्यते। सम्मेलनस्य मुख्यविचारबिन्दुरस्ति “स्थायि-प्रगतेभ्यः सर्वेभ्यः सुरक्षितं सौगणिक-संजाल-सौविध्यम्” इति। सम्मेलने∫स्मिन् सपादशतदेशेभ्यः दशसहस्राधिकाः विश्वनेतारः नीतिनिर्मातारः, उद्योगपतयः, चिन्तकाः, संगणकविशेषज्ञाः च  विभिन्नान् विषयबिन्दून् अधिकृत्य स्वीयमुद्गारं प्रकाशयिष्यन्ति।

तृशूर् – प्राशासनिकविद्यालयीयाः ३०८८ अध्यापकाःभविष्यनिधौ अङ्गत्वमलभमानाः क्लेशमनुभवन्ति। माध्यमिकस्तरे हिन्दी, संस्कृतम्, अरबी,उर्दू, तमिल् कन्नट भाषाणाम् अध्यापकाः एव भविष्यनिधेः आनुकूल्यात् बहिष्कृताः। पी.एस्.सी. संस्थया सर्वकारीण विद्यालयेषु नियुक्ताः अर्धसमयिकाः पूर्णसमयानुकूल्ययुक्ताश्च भाषाध्यापकाः विद्यालयेषु वर्षाणि यावत् कर्म कुर्वन्तः भवन्ति। परम् सर्वकारसाहाय्यक वैयक्तिकविद्यालये समकाले नियुक्ताः अध्यापकाः भविष्यनिधेः आनुकुल्यं लभन्ते। सर्वकारविद्यालयस्थानाम् अध्यापकानामपि भविष्यनिधिमायोजयितुं नियमस्य परिवर्तनार्थं आर्थिकविभागेन चतुर्वारं पत्रं प्रेषितम्। तथापि शिक्षाविभागेन इतः पर्यन्तं निर्णयो न स्वीकृतः।

अर्धसमयरूपेण पञ्चवर्षाणि कर्म कुर्वन्तः अध्यापकाः पूर्णसमयानुकूल्यानि लभेरन्। परन्तु एकादशवर्षाणि यावत् एतदानुकूल्यम् अलभमानाः बहवः सन्ति अध्यापकाः। इतरकर्मकरेभ्यः सामयिककर्मकरेभ्यश्च एतदानुकूल्यं दीयते, परन्तु अध्यापकेभ्यः न दीयते। कार्यमेतत् परिगणनार्हमिति शिक्षा मन्त्री प्रोफ. सी. रवीन्द्रनाथः अवोचत्।

कोषिक्कोट् – केरलेषु विद्यालयीयशास्त्रोत्सवः नवम्बर् २३तः २६ पर्यन्तं कोषिक्कोट् नगरे प्रचलिष्यति।२१७ खण्डेषु ६८०२ प्रत्याशिनः प्रतियोगितायां भागभाजः भविष्यन्ति। चतुर्दिवसीयः अयमुत्सवः, तदर्थं ९ वेदिकाः सज्जीकृताः। शास्त्र-गणितशास्त्र-समाजशास्त्र-कर्मकुशलता-सूचनासाङ्केतिकविद्या प्रतियोगिताः अतिरिच्य विशिष्टविद्यालयीयछात्राणां कृते ३७ खण्डेषु पृथक् स्पर्धा, वोक्केषणल् एक्स्पो इत्यादीन्यपि अत्रैव आयोजयिष्यति।

पस्पर्धयिषूणां कृते आवासव्यवस्था भोजनं यातायातव्यवस्था च सङ्घाटकैरेव आयोजयिष्यन्ते।

पणजी. – गोवा चलचित्रोत्सवाय दीपं प्राज्वालयत्। गोवा मुख्यमन्त्री मनोहर् परीखर्, केन्द्रमन्त्री स्मृती इरानी प्रभृतयः भागम् अभजन्। बोलीवुड् तारं षा रुक् खान् विशिष्टातिथिः आसीत्। प्रसिद्धस्य इरानियन् निदेशकस्य बियोण्ट् द क्लौट् आख्यं चलचित्रम् आसीत् उद्घाटनचित्रम्। सम्पूर्णे सदसि एव चित्रं प्रदर्शितम्। चलचित्रस्य नायकः इषान् घट्टार् नायिका मालविका मोहनश्च उद्घाटनसमारोहे भागम् अभजताम्।