Daily Archives: November 8, 2017
हैदराबाद् महानगरे भिक्षाटनं निरुद्धम्।
हैदराबाद् – हैदराबाद् नगरे अधिकारिभिः भिक्षाटनं निरुद्धम्। इतःपरं भिक्षामटन्तः दणडार्हाः भविष्यन्ति इति महानगरारक्षिदलमुख्यः सूचनामदात्। गतागतसम्मर्देषु पदातिषु च मध्ये भिक्षाटनं कुर्वन्तः सामान्यजनानां क्लेशाय कल्पन्ते इत्यावेदनानुसारमेव एष निर्णयः। केषाञ्चन सङ्घटनानां सर्वेक्षणानुसारं अस्मिन् महानगरे १४००० भिक्षाटकाः सन्ति, तेषु १५०० परिमिताः बालकाश्च भवन्ति।
विमुद्रीकरणनिर्णयस्य अद्य वार्षिकम्।
नवदिल्ली – प्रशासनस्य विमुद्रीकरणनिर्णयस्य अद्य वर्षपूर्तिः वर्तते। गतवर्षे नवम्बर् मासस्य अष्टमे दिवसे पञ्चशतैकसहस्ररूप्यकाणां पुरातनधनपत्राणां प्रत्यावर्तननिर्णयः स्वीकृतः आसीत्। वित्तमन्त्री अरुण् जेट्ली गतदिने वार्ताहरान् संबोधयन् अवोचत् यत् विमुद्रीकरणस्य क्रियान्वितेः अनन्तरं दृश्ये पारदृश्या स्वच्छतरा सत्यनिष्ठा च वित्तीयव्यवस्था समक्षमायाता।
