तिरुवनन्तपुरम् – ओखी दुरन्ते इतः पर्यन्तं ६४ कर्मकराः मृताः इति औद्योगिकी विज्ञप्तिः। बुधवासरे प्रातः विविधजिल्लासु सागरतीरेभ्यः सप्त मृतदेहाः लब्धाः। बेप्पूर् पोन्नानि चेल्लानं प्रभृतिभ्यः तीरेभ्यः एव एते लब्धाः। सागरे मत्स्यबन्धनार्थं गताः कर्मकराः एव मृतदेहान् दृष्टवन्तः। तेषां सूचनानुसारं तीरदेशरक्षिदलम् आगत्य मृतशरीराणि तीरमनयत्।
एतस्मिन्नन्तरे राज्यस्थेषु विविधेषु चिकित्सालयेषु विना प्रत्यभिज्ञानं ३६ मृतदेहाः सन्तीति अधिकृतैः विज्ञापितम्।

सौदि-अरबियादेशेन चलचित्रगृहेषु चिरादारोपितः प्रतिबन्धः सम्प्रति दूरीकृतः। ह्यः एतम्-विषयिणीम् उद्घोषणामाचरिता तत्रत्येन संस्कृति-सूचना-विभागीय-मन्त्रिणा प्रोक्तं यत् चलचित्रगृहेषु चलचित्राणां प्रदर्शनेन देशस्य आर्थिक-विकासो भविष्यति।

अस्माकं संस्कृतेः अधिष्ठानं संस्कृतभाषा एव तां भाषां न्यूनीकर्तुं य़ः परिश्रमः सः विज्ञानस्य पिधानसमः स्यात् इति केरलमुख्यमन्त्री श्री पिणरायि विजयःअवदत्। विज्ञानेन दिग्विजयमवाप्तवान् शङ्कराचार्यः। विज्ञानेन अन्धकारनिरासरूपी आसीत् तस्य दिग्विजययात्रा। शङ्राचार्यस्य नामधारिणः विश्वविद्यालयस्य लक्ष्यम् उत्तरदायित्वं च तादृश एव भवेत् इत्यपि स न्यगादीत्।कालटी सर्वकलाशालायाः रजतजयन्ती समारोहम् उद्घाटनं कुर्वन् भाषमाण आसीत् मुख्यमन्त्री। उपकुलपतिः डो. धर्मराज अटाट् अध्यक्षः आसीत्। भूतपूर्वाः उपकुलपतिवर्याः समारोहे समादृताः।

वत्तिक्कान् – ओखी दुरन्ते अनुशोचनम् आशङ्कां च सूचयन् क्रैस्तवानां परमाध्यक्षः फ्रान्सिस् मार्पापा। केरले तमिल् नाटु राज्ये च दुरितमनुभवद्भिः सहैव मम हृदयमपीति मार्पापा वर्यः वत्तिक्कान् नगरे अवोचत्। तिरोभूतानां मत्स्यबन्धनकर्मकराणां परिवारेभ्यः सः स्वकीयं साहाय्यम् आवेदयत्। सेय्न्ट् पीट्टेर्स् चत्वरे प्रार्थनायाः अनन्तरमेव मार्पापा ओखी दुरन्तबाधितान् अन्वस्मरत्।

तिरुवनन्तपुरम् – ओखी दुरन्तनिवारणप्रवर्तनेषु केन्द्र-राज्य प्राशासनिकानां दायित्वं फलप्रदं नास्तीति संसूच्य मत्स्यबन्धनकर्मकराणां राजभवनपथसञ्चलनं आनन्तपुर्यां प्रारभत। प्रातः ११.३० वादने लत्तीन् क्रैस्तवीयानां सभाध्यक्षः डो.एं सूसैपाक्यं पथसञ्चलनम् उदघाटयत्। पथसञ्चलने ५०००० अधिकाः कर्मकराः भागं गृहीताः। दुरन्ते तिरोभूतान् कर्मकरान् सपदि गोचरान् कर्तुं सुविधा आयोजनीया, ओखी राष्ट्रियदुरन्तत्वेन परिगणनीया, नष्टमनुभूतान् पुनरधिवस्तुं पद्धतयः आसूत्रणीयाः इत्येवमादयः तेषां चोदनाः।

तृशूर्- ५८तमः केरलराज्यस्तरीयः विद्यालयकलोत्सवः जनुवरी मासे तृशूर् नगरे सम्पत्स्यते। कलोत्सवस्य मुख्यवेदिकायाः स्थूणारोहणं कृषिमन्त्री श्री सुनिल् कुमार् वर्यः निरवहत्। तृशूर् तेक्किन् काट् प्रदर्शिका स्थलमेव मुख्यवेदिका। तृशूर् जनपदीयानां सामाजिकानां सान्निध्ये आसीत् स्थूणारोहणम्। अत्रत्याः जनाः सन्तोषेण कलोत्सवं प्रतीक्षन्ते इति मन्त्री अवदत्।

श्रीशङ्कराचार्य संस्कृतसर्वकलाशालायाः उपकुलपतित्वेन डो. धर्मराज् अटाट् महाभागःस्थानारूढः। गतान् त्रिचतुरान् मासान् यावत् स उपकुलपतेः अतिरिक्तदायित्वे आसीत्। कालटि श्रीशङ्कराचार्यसंस्कृतसर्वकलाशालायाम् अध्यापकपदवीमलंकृतः अयं साहित्यविभागे अध्यक्षः, संस्कृतप्रचारणकार्यक्रमस्य निर्वहणाधिकारी इत्यादिषु पदवीषु स्वकर्तव्यं प्रशस्तरूपेण निरवहत्।अनन्तरम् अतिरिक्तोपकुलपतिरूपेण कर्तव्ये निरतः असीत्। संस्कृतपण्डित एव संस्कृतसर्वकलाशालायाः उपकुलपतिः जातः इत्येतत् संस्कृतप्रेमिणाम् अभिमानास्पदं भवति। श्रीमते धर्मराज् अटाट् वर्याय नववाण्याः हार्दिकाः शुभकामनाः।

अहम्मदाबाद् – गुजराते विधानसभानिर्वाचनानां प्रथमे चरणे अद्य कच्छ-सौराष्ट्र-दक्षिणगुजरात-जनपदानां नवाशीत्यासनेषु मतदानानि समायोज्यन्ते। मुक्त-युक्तपरिवेशे मतदानानि निष्पादयितुं मतदानकेन्द्राणि परितः व्यापकाः सुरक्षा-प्रबन्धाः परिकल्पिताः सन्ति।