तिरुवनन्तपुरम्- नवोत्थाननायको योगिवर्यः नारायणगुरुदेवः युक्तिभद्रतां द्रढीकृतवान् महान् योगी आसीत्। जाति-धर्मभेदानुसारं जनेषु उच्चनीचत्वं संस्थापिते समाजे देवदूत इव समागतवान् गुरुदेवः। सिंहमासे शतभिषक् नक्षत्रे भूजातस्य अस्य जयन्ती प्रतिवर्षं सिंहमासे शतभिषक् नक्षत्रदिने एव समाचरन्ति। अतः दिवदर्शिकानुसारं निश्चिते वासरे आचरितुं न शक्यते।

एका जातिः एको धर्मः एको देवः मनुष्याणाम्, धर्मः यःकोपि भवतु, मानवस्य उत्कृष्टता एव मुख्या, मनुष्याणां मनुष्यत्वं जातिर्गोत्वं यथा गवि इत्यादिभिः उद्घोषणैः स जनान् उदधारयत्।

अस्य महाशयस्य जयन्तीसमारोहे सर्वेभ्यो शुभाशयाः

तिरुवनन्तपुरम्- सार्वजनीनशिक्षाविभागे संस्कृतस्य कृते मण्डलस्थलेषु उपमण्डलस्थलेषु च संस्कृत अक्कादमिक समितेः प्रवर्तनानि प्रचलन्ति वर्तन्ते। एषां संयोजकत्वेन राज्यस्तरे एकः कार्यदर्शी विद्यते। अस्मिन् वर्षे एतस्मिन् कार्यदर्शिपदे तिरुवनन्तपुरं देशस्थः श्रीमान् एस् श्रीकुमारः चितो वर्तते।

एष महोदयः तिरुवनन्तपुरं मण्डले पारश्शाल उपमण्डले कारक्कोणं पी.पी.एम्. उच्चविद्यालये संस्कृतशिक्षकः भवति। बहुकालं यावत् स मण्डले उपमण्डले च कार्यदर्शिपदे प्रवर्तनं कुर्वन्नासीत्।

राज्य शैक्षिकानुसन्धान प्रशिक्षण परिषदः प्रशिक्षणकार्यक्रमे विशेषज्ञः, पाठपुस्तककर्मशालायां अङ्गं नववाणी सम्पादकसमित्यङ्गम् इत्यादिषु अस्य प्रवर्तनं बहूपकारकमस्ति। कैट् विक्टेस् नालिकाद्वारा विद्यालयीयछात्राणां कृते ओण्लैन् कक्ष्या अपि अनेन गृहीता।

राज्यस्तरीय संस्कृतसमित्याः कार्यदर्शिपदं प्राप्तस्य श्रीकुमारस्यलकृते नववाणि संघस्य अभिनन्दनानि।

कोल्लम्- श्रावणोत्सवकाले केरलीयानां मावेलिप्पाट्ट् इति महाबलिप्रशस्तिगीतं संस्कृतेन गायन्त्यौ द्वे बालिके जनानां मनांसि हठादाकर्षतः। माबलिशासनकाले देशे मानवास्सर्वे समाना एव इति अद्वैतायाः अतिथेश्च गानं श्रुत्वा मलयालभाषाकुतुकिनः चकितचित्ताः जायन्ते।

अद्वैता अतिथी च युगलबालिके स्तः। दशमकक्ष्या छात्रे भवतः एते। पालक्कुलङ्ङर भगिन्यौ इति प्रथिते एते। संगीते अतुल्यप्रतिभे एते अस्मिन् वर्षे संस्कृतमावेलि गानेन साकं जनान् अभिमुखीकुर्वतः।

एरणाकुलं जिल्ला शिक्षकप्रशिक्षण संस्थायाम् अध्यापकत्वेन वृत्तिं कुर्वन् वृत्तिविरतः मुत्तलपुरं मोहन्दास् वर्यः एव मावेलिगानं संस्कृतेन अनूदितवान्।

Video… Click here

तिरुवनन्तपुरम्- एकादशकक्ष्या(प्लस् वण्) प्रवेशाय नामाभिलेखनम् अस्मिन् मासे २४ तमे दिनाङ्के प्रारभते। प्रक्रियेयं जालाधारिता भवति। पूर्वं श्वः समारम्भाय निश्चितं परन्तु तन्त्रांशस्य परिष्करणाय समयम् अपेक्षितम् इत्यतः स निर्णयः परिवर्तितः। ओणोत्सवात् परं परिष्कृतः तन्त्रांशः उपलब्धः स्यात् इत्यतः २४ तमे दिनाङ्के निश्चितम्।

कस्मिन्नपि क्रमे छात्राः न्यूना चेत् स क्रमः परिवर्त्य अन्यस्मै मण्डलाय दीयते। यत्र छात्रानुपातिकत्वेन क्रमाधिष्ठानं नास्ति चेत् तत्र अतिरिक्ततया अधिष्ठानं परिकल्प्यते।

नवदिल्ली- पञ्चसप्ततितमस्य स्वतन्त्रतादिवसस्य समाचरणाय राष्ट्रं सज्जमभवत्। रविवासरे प्रातः सार्धसप्तवादने लोहितदुर्गे प्रधानमन्त्री नरेन्द्रमोदीवर्य राष्ट्रियध्वजम् आरोपयिष्यति। केन्द्रियमन्त्रिणः विविधाः सेनामेधावयश्च भागं गृहीष्यन्ति।

भीषायाः भूमिकायां दृढा सुरक्षा राजधान्यां परिकल्पिता। लोहितदुर्गं बहिः स्थित्वा वीक्षितुम् अशक्यरूपेण भारवाहियानैः आच्छादितं वर्तते। पुरातनदिल्यां वाणिज्यसंस्थानानि पिहितानि दृश्यन्ते।

सायुधसेनाविभागाः लोहितगुर्गं परितः विन्यस्ताः। प्रातः चतुर्वादनात् दशवादनपर्यन्तं लोहितदुर्गमं परितः रथ्यायां वाहनानि निरुद्धानि।

तिरुवनन्तपुरम्- विश्वाभिलेखमुपलक्ष्य निर्मीयमाणस्य संस्कृतचलचित्रस्य मधुभाषितम् इत्यभिधस्य चित्रीकरणं राष्ट्रिय संस्कृतदिने (ओगस्त २२ दिनाङ्के) समारभते।SGISFSY PRIDUCTIONS इत्यस्य केतने सान्स्क्रीट् फिलिं सोसैट्टी केरलराज्य चलचित्र विकास निगमस्य(KSFDC) सहयोगेनैव चलचित्रं निर्मीयते। बालकानां कृते निर्मितस्य प्रथम संस्कृतचलचित्रस्य मधुरस्मितस्य निदेशकः सुरेष् गायत्री वर्य एव अस्यापि निदेशकः।

आयुर्वेदस्य महत्वमुद्घोषयतः अस्य चलचित्रस्य गीतानि जालाधारितरूपेण चित्रीक्रियन्ते।

चलचित्रस्यास्य पटकथा प्रसाद् पारप्पुरम् अस्ति। मुत्तलपुरं मोहन् दास्, हरिप्रसाद् कटम्बूर् इत्येतयोः गीतानां संगीतनिदेशनं अरुण् व्लात्ताङ्करा एव।

रेवती, अलीनिया ऐफुना अञ्जना प्रभतयः अभिनेतारः प्रधानकथापात्राणि अवतारयन्ति। चलचित्रमिदं शिशुदिने प्रदर्शनार्थम् उद्दिश्यते।

तिरुवनन्तपुरम्- अस्मिन् वर्षे श्रावणपूर्णिमातिथिः आगस्त् मासस्य २२ तमे दिनाङ्के भवति। अतः तस्मादारभ्य एकसप्ताहपर्यन्तं राज्यस्थेषु विद्यालयेषु जालाधारितकार्यक्रमाः आयोजनीयाः इति सार्वजनीन-शिक्षानिदेशकः प्रतिवेदयति।

कार्यक्रमे/स्मिन् छात्राणां कृते गानालापः, भित्तिपत्ररचना, चित्ररचना, चित्रकथारचना, पर्यावरणसम्बन्धीनां वस्तूनां संस्कृतनामलेखनम्, शब्दकोषरचना इत्यादयः अन्तर्भवन्ति।

शिक्षा उपमण्डलेषु आगस्त् ३० दिनाङ्काभ्यन्तरे, शिक्षामण्डलेषु सेप्तम्बर् ५ दिनाङ्काभ्यन्तरे कार्यक्रमाः भवेयुः। तत्र अध्यापकानां कृते कथा,कविता,उपन्यासः, पटकथा, समस्यापूरणम् इत्यादिषु मत्सरः आयोजनीयः।

१४ मण्डलेषु सेप्तम्बर् २० दिनाङ्काभ्यन्तरे संस्कृतदिनाचरणम् आयोजनीयम्। राज्यस्तरीयसंस्कृतदिनाचरणम् ओक्टोबर् प्रथमे वारे भविष्यति।

रचनामत्सरार्थं विषयाः-
कथा – एतदेव मम जीवनस्य परिवर्तनम् अकरोत्।
कविता- शुभप्रयाणम्
उपन्यासः- संस्कृतभाषाभिरुचिवर्धनाय उपायाः।
समस्या- स्वस्थं शरीरं च मनोनिवार्यम्।
पटकथा, ह्रस्वचलच्चित्रम् इत्येतयोः विषयन्बन्धनं नास्ति , चलच्चित्रदैर्घ्यं परमतः १५ निमेषाः परिमिताः।

टोक्यो- ओलिम्पिक्स क्रीडायां क्रीडकविभागे भारतस्य प्रथमः सुवर्णपदकः कुन्तास्त्रप्रक्षेपे अद्य समागतः। अनेन ओलिम्पिक्स् रंगे सुवर्णपदकमाप्तवान् प्रथमः क्रीडकः भवति नीरज् चोप्रः।

प्रथमे प्रक्षेपे चोप्रः ८७.०३ मीट्टर् दूरे कुन्तास्त्रं क्षिप्तवान्। द्वितीये प्रक्षेपे ८७.५८ मीट्टर् दूरं समासादितवान्।

अस्मिन् विभागे अन्तिमचक्रे प्रविष्टवान् प्रथमो भारतीयश्च भवति नीरज् चोप्रः।

टोक्यो- ४१ वर्षानन्तरं पुरुषाणां होक्की स्पर्धायां पदकानुसूच्याम् भारतस्य नाम अङ्कितम्। उद्वेगभरिते मत्सरे जर्मनीराष्ट्रं ५-४ इति क्रीडाङकेन भारतेन पदकमवाप्तम्।

मत्सरस्य प्रथमे परिच्छेदे जर्मनी पुरो/गच्छत्। परन्तु तृतीये परिच्छेदे भारतस्य क्रीडाङ्कद्वयं विजयपथमसूचयत्। भारतस्य हार्दिक् सिंह्, हर्मन् प्रीत् सिंह्, इत्येतयोः सामर्थ्येनैव क्रीडाङकलाभः सञ्जातः।

तृशूर्- केन्द्रसर्वकारस्य निर्णयस्य पश्चात् कुतिरान् सुरङ्गयोरेकम् उद्घाटितम्। पालक्काट्तः तृशूरं प्रति मार्गस्थः सुरङ्ग एवायम्। शनिवासरे रात्रौ सार्धसप्तवादने तृशूर् मण्डलाधिकारी हरित वि कुमार् महाभागा एव गमनागमनार्थं सुरङगमार्गम् उदघाटयत्। अनेन कोच्ची-कोयम्पत्तूर् राजमार्गे यात्रासमयं न्यूनं भविष्यति।

राज्यस्थः प्रथमः सुरङ्गमार्ग एवायम्। केन्द्रिय-यातायातमन्त्री नितिन् गड्करी वर्यः ट्विट्टर् द्वारा उद्घाटनवार्तां सूचयति स्म।