तिरुवनन्तपुरम्- केरलराज्ये काविड् भीत्या पिहिताः विद्यालयाः नवम्बर् प्रथमे दिनाङ्के पुनरुद्घाटयिष्यन्ति। सार्धैकवर्षानन्तरमेव एते प्रवर्तनसज्जाः भवन्ति। मुखियमन्त्रिणः पिणरायि विजयस्य आध्यक्ष्ये समायोजिते कोविड् अवलोकनाधिवेशने एवायं निर्णयो जातः।

विद्यालयानाम् उद्घाटनमनुबन्ध्य मार्गनिर्देशः, केषु केषु कक्ष्यासु अध्ययनम् आरभेत इत्यादि विषयेषु निर्णयः अनन्तरं भविता।

प्राथमिकस्तरे विद्यालयानां प्रवर्तनं न भविता इति सूचना विद्यते। नवमकक्ष्यायाः आरभ्य अध्ययनं भविता इति निर्णयः विद्यते।

चालक्कुटि- चालक्कुटि संस्कृतम् अक्कादमिकसमितेः नेतृत्वे लेचनम् २०२१ इति शिक्षकप्रबलीकरणकार्यक्रमस्य उद्घाटनं सेप्तम्बर् १८ दिनाङ्के शनिवासरे समायोजितं वर्तते। प्रतिमासं विविधविषयानधिकृत्य प्रगद्भानां दश वर्गाः अस्यां प्रपाठावल्यां भविष्यन्ति। प्रथमवर्गः कालटि श्रीशङ्कराचार्य-संस्कृतविश्वविद्यालये संस्कृतसाहित्य विभागाध्यक्षः डो वी आर् मुरलीधरवर्यः नेष्यति। केरलीयकलाः संस्कृतं च इति विषये एव वर्गः चालयति। इरिङ्ङालक्कुट शिक्षामण्डले अन्तर्भूतानां चालक्कुटि, माल, कोडुङ्ङल्लूर्, इरिङङालक्कुटा, उपमण्डलस्थानां एल् पी, यु पि, हैस्कूल् विभागशिक्षकाणां तथा संस्कृतप्रेमिणां च प्रयोजकरूपेणैव लोचनम् २०२१ क्रमीकृतम्। एतेभ्यः चतुर्भ्यः उपमण्डलेभ्यः सर्वे अध्यापक प्रथमवर्गादारभ्य अस्यां प्रपाठावल्यां भागं गृह्णन्तु इति इरिङ्ङालक्कुटा विद्याभ्यासमण्डलस्थः संस्कृतसमितेः कार्यदर्शी श्रीमान् बिजु के डि अभिवेदयति।

तिरुवनन्तपुरम्- सर्वोच्चन्यायालयस्य निर्णयमनुसृत्य राज्ये विद्यालयानां प्रवर्तनतिथिः निर्णेष्यते इति केरलशिक्षामन्त्री वी शिवन् कुट्टिवर्यः अवदत्।

साङ्केतिकसमितेः अभिवेदनानुसारं विद्यालयानां प्रवर्तनाय अनुमतिरस्ति। अतः प्रवर्तनतिथिः मुख्यमन्त्रिणा प्रस्तोष्यते इत्यपि मन्त्री अवदत्। विद्यालयप्रवर्तनात् पूर्वं छात्रेभ्यो वाक्सिनदानस्य आवश्यकता नास्तीति विदग्धसमितेः सूचना अस्ति। छात्राणां प्रतिरोधशेषिरस्तीति कारणेवैवायं निर्णयः। परं राज्ये विद्यालयप्रवर्तनं विरुध्य कश्चन विभागः तिष्ठतीत्यपि तेन निगदितम्।

नवदिल्ली- अध्यापन-अध्ययनप्रक्रियाः कालानुसारं नवीक्रियन्ते चेत् एव राष्ट्रे शिक्षायाः श्रेष्ठता विश्वश्रेणीं प्राप्स्यति इति प्रधानमन्त्री नरेन्द्रमोदीवर्यः अवदत्। परिवर्तनानि सहकारितया विवर्धनीयानि इति च शिक्षण् पर्व् इति दौत्यं वीडियो सम्मेलनद्वारा उद्घाटयन् प्रधानमन्त्री व्याहरत्। शिक्षाक्षेत्रे नवीनयोजनानां समारम्भरूपं दौत्यमस्ति शिक्षण् पर्व्।

भारतीय आङ्गिकभाषानिघण्डुः,(श्रवणपरिमितानां कृते)भाषमाणं पुस्तकम्(दर्शनपरिमितानां कृते) सी बी एस् इ मूल्यनिर्णय रूपरेखा, शिक्षकप्रशिक्षण कार्यक्रमः निष्ठा, विद्याञ्जलिः इति जालपुटः इत्यादीनां समारम्भमपि प्रधानमन्त्री निरवहत्।

तिरुवनन्तपुरम्- शिक्षकदिनाचरणस्य भागत्वेन उच्चतरविद्यालयीय शिक्षकाणां संघः नवधारा नामकः आधिजालिकं गुरुवन्दनम् समायोजयत्। सेप्तम्बर् ५ सायं सप्तवादने आयोजिते समारोहे डी जेयिस् वर्यः अध्यक्षः आसीत्। केरलीय शिक्षाविभागमन्त्री वी शिवन् कुट्टि वर्यः समारोहस्य उद्घाटनं निरवहत्।

प्रोफ वी माधवन् पिल्ला वर्यः समारोहे समादृतः अभवत्। राज्यशैक्षिकानुसन्धानप्रशिक्षणपरिषदः निदेशकः डे जे प्रसाद् वर्यः मुख्यभाषणं व्यदधात्। डो पी नारायणन् नम्पूतिरिः, एन् के रामचन्द्रन् वी विजयन् , कृष्णशर्मा, जयमेहनगुरुक्कल्, वी श्रीकण्ठन्, एस् श्रीकुमार् प्रभृतयः आशंसाभाषणमकुर्वन्। स्टैजू, शालिनी,मञ्जू प्रभृतयः अध्यापकाः कार्यक्रमस्य प्रयेक्तारः आसन्। डो उल्लास् वर्येण स्वागतभाषणं तथा श्रीजित् वर्येण कृतज्ञतां च व्याचक्रतुः।

इरिञ्ञालक्कुटा – महाजनानां गुरूणां च सान्निद्ध्येन प्रभाषणेन च इरिञ्ञालक्कुटा विद्याभ्यासजिल्लायाः संस्कृतदिनं सुसम्पन्नं जातम्। कोटुङ्ङल्लूर् नियमसभासामाजिकेन श्रीमता वि. आर्. सुनिल्कुमार महोदयेन समुद्घाटिते सम्मेलने विद्याभ्यासजिल्लाधिकारी श्री एन्.डि. सुरेष् वर्यः अध्यक्षतां निरवहत्। विद्याभ्यासजिल्ला कार्यदर्शी श्री के.डि. बिजुः सर्वेभ्यो स्वागतमर्पयत्।  संस्कृतभारत्याः आगोलसंयोजकः श्री. पि. नन्दकुमारः विशिष्टभाषणं कृतवान्। प्रमुखचलनचित्राभिनेता श्री सुनिल् सुखदा वर्यः, राज्यस्तरीयसंस्कृत कौम्सिल् अध्यक्षः श्री एस्. श्रीकमारः च सन्निहितौ आस्ताम्।  चिन्मयासंस्थायाः प्रवर्तकः स्वामी शारदानन्दसरस्वतिवर्यः संस्कृतदिनसन्देशं प्रदत्तवान्।

प्रतिकृतिः इति नूतनसंस्कृतचलनचित्रस्य संविधायकः डो. निधीष् गोपि , निर्माता श्री प्रशान्तः च अस्मिन् सम्मेलने विशिष्टाभिनन्दनेन समादृतौ। एन्.एन्. रामः, एम्.वि. विवेकः, के.आर् रामचन्द्रः, पि.एस्. उण्णिकृष्णः, पि.पि. प्रतापन्, के. श्रीदेवी च भाषणमकुर्वन्। अभिनव् वि.जी, निरञ्जन् सजीव् नामकौ छात्रौ संस्कृतगानं आलपितवन्तौ।

तिरुवनन्तपुरम्- अद्य सेप्तम्बर् ५ दिनाङ्कः। अयं दिवसः शिक्षकदिवसत्वेन आराष्ट्रम् आचर्यते। राष्ट्रपतिचरस्य डो एस् राधाकृष्णन् वर्यस्य जन्मदिवसमेव शिक्षकदिनत्वेन निश्चितम्।

केरलसर्वकारेण प्रतिवर्षम् अस्मिन् दिने विशिष्टसेवापुरस्कारेण राज्यस्थाः शिक्षकाः आद्रियन्ते। अस्मिन् वर्षेपि प्राथमिकस्तरे १४, उच्चविद्यालये १४, उच्चतरविद्यालये ७, वि एच् एस् इ तले ५ च अध्यापकेभ्यो विशिष्टसेवापुरस्काराः घोषिताः।

सर्वेभ्यो अध्यापकेभ्यो शुभशंसाः।

तिरुवनन्तपुरम्- राज्यस्थाः विद्यालयाः अचिरेणैव प्रवर्तनसज्जाः भविष्यन्ति। तदर्थं प्रायोगिकतां निरीक्षितुं विदग्धसमितिं नियोक्ष्यतीति शिक्षामन्त्रिणा वी शिवन् कुट्टि वर्येण निगदितम्।

समितेः अभिवेदनं परीक्ष्य मुख्यमन्त्रिणा साकं चर्चां च विधास्यन्नेव निर्णयः स्वीकरिष्यति।

राज्ये कोविड् रोगव्यापनस्य आधिक्ये आशङ्का नावश्यकी। रविवासरे पिधानं तथा रात्रौ निरोधनाज्ञां च विहाय विद्यालयान् पुनरुद्घाट्य जनजीवनं साधारणरूपेण नेतुं शक्यते इति मुख्यमन्त्रिणा समायोजिते अधिवेशने अन्ताराष्ट्रतले विदग्धाः निर्दिशन्ति स्म। तदनुसारमेव शिक्षामन्त्रिणः प्रस्तावना।

पालक्काट्र – लसंसकृताद्ध्यापकफेडरेषन् संस्थायाः दायित्वे पालक्काट् जनपदस्तरीय संस्कृत दिनाचरणम् समायोजितम्। भारतीयसंस्कृतेः प्रत्यभिज्ञानं संस्कृत पठनेन स्वायत्तीकर्तुं शक्यते इति उत्तराखण्डराज्यस्थ केन्द्रीय संस्कृत विश्वविद्यालयस्य वैदिकविभाग प्राध्यापकः डोः अमन्दमिश्रमहोदयः स्वीयोद्घाटनभाषणेऽब्रवीत् । संस्कृतं संस्कृतेनैव पठनस्य पाठनस्य च आवश्यकतां अधिकृत्य केरलसर्वकारीय महाविद्यालयीय ज्योतिषविभागस्थ प्राध्यापकः डोः सुधीष् ओ एस् महाभागोवदत्। पालक्काट् डयट्संस्थायाः प्राचार्यः श्री के एन् सोमराज महाशयः विशिष्ठातिथि रूपेणोपस्थितः। श्री अनिल् कोन्नेलिक्कल् महोदयेन विरचितं मञ्जुभाषिणीति गीतं आलप्य मेलने प्रकाशितम्। केरलसंसकृताद्ध्यापकफेडरेषन् संस्थायाः प्रान्तीयाध्यक्षः श्री पि पद्मनाभः महाशयः, प्रान्तीयोपाध्यक्षः श्री के के राजेष् महोदयः, जनपदाध्यक्षः श्री एस् भास्करः, श्रीमति रचिता, श्रीमति सुजाता, श्रीमति राखी इत्येते स्वाभिमतान् प्रकटितवन्तः । १२ जनपदेभ्यः संस्कृतशिक्षकाः भागं स्वीकृतवन्तः। जनपदस्तरीय शैक्षणिक अधिकारिणः अपि भागं स्वीकृतवन्तः।

सम्पादकः राजकृष्णः।

डो. निधीष् गोपी वर्येण प्रस्तुतं प्रतिकृतिः इति चलच्चित्रं हृद्यं कञ्चन दृश्यानुभवम् अस्मभ्यं ददाति। चलच्चित्रस्यास्य कथा, पटकथा, सम्भाषणं, गीतानि, निदेशनं च डो. निधीष् गोपीवर्येण समासादितम्। संस्कृतमजानानां साधारणानामपि अवगमनार्थं ललिता शैली अत्र स्वीकृता वर्तते। चलच्चित्रमिदं पश्यन्तः वयम् अजानाना एव होराद्वयं पर्यवस्यति। अस्माकं भाषणशैल्यां संस्कृते भाषमाणे एषा मलयालभाषा वेति सन्देहः प्रेक्षकाणां मनसि जायेत। कथा पटकथा सम्भाषणं गीतानि अभिनयश्च उत्कृष्टानि एव।

प्रसाद् मल्लिश्शेरीवर्यस्य रामकृष्णः, निपिन् उण्णी वर्यस्य आदित्यः, चिन्मयी रवि वर्यायाः उत्तरा अखिल् वेलायुधस्य दिनेशः इत्यादीनि कथापात्राणि मनसि निहितानि सन्ति। सुनिल् सुखदा वर्यस्य केशवन् नायर् इति पात्रमपि अत्युत्तमं भवति।

संस्कृतभाषोपासकानाम् एतादृशम् अधिकव्यययुक्तं प्रवर्तनं श्लाघनीयं प्रोत्साहनीयं च भवति खलु। तदस्माकं कर्तव्यमेव। दृश्यकाव्यमिदं जनाः परमतः पश्येयुः। तद्वारा संस्कृतम् अस्माकं सर्वेषां भाषा इति प्रतीतिः जनमनसि जायेत।
चलच्चित्रस्यास्य रङ्गे नेपथ्ये च प्रवर्तितेभ्यः सर्वेभ्यः शुभाशंसाः।