तिरुवनन्तपुरम्- कोषिक्कोट् जनपदः निपा विषाणोः मुक्तो/भवत्। विषाणौ नियन्त्रणविधेये जाते सामान्यकार्यक्रमाणां विद्यालयप्रवर्तनानां च कल्पितानि नियन्त्रणानि न दीर्घीकुर्वन्ति इति स्वास्थ्यमन्त्री श्रीमती के.के. शैलजावर्या अवदत्। अतः सर्वे विद्यालयाः कलालयाश्च १२ दिनाङ्कात् प्रभृति साधारणतया प्रवर्तिष्यन्ते। परन्तु निपाविषाणुबाधितैः सह सम्पर्कं कृतवतां निरीक्षणम् अनुवर्तते। २६४९ जनाः अधुना निरीक्षणे सन्ति। इतः पर्यन्तं परीक्षितेषु ३१३ जनेषु २९५ जनाः निपाबाधिताः न सन्तीति परीक्षणफलम्। विषाणोः उत्पत्तिस्थानमधिकृत्य अन्वेषणं पुरो गच्छति इत्यपि मन्त्री असूचयत्।

वाषिङ्टण्- उद्वेगकरेण अवगमेन सह अमेरिक्का बाह्याकाश गवेषण अभिकर्ता नासा इति संस्था। नासायाः कुजदौत्य पेटकस्य कुर्योसिट्टी नामकस्य इदं शास्त्रावरणं शास्त्रलोकं सम्पूर्णं अद्भुताविष्टम् अकारयत्। कुजग्रहे जीवस्य सान्निध्यमस्तीति नासायाः नूतनः अवगमः। जेर्णल् सयन्स् इति पत्रिका एक कार्यमिदं प्राकाशयत्। कुजस्य उपरितले त्रिशतवर्षप्राचीनेषु शिलावशिष्टेषु जैवतन्मात्राः सन्ति तिसृभ्यः कुजवर्षेभ्यः प्राक्(षट् भौमवर्षः ) वातावरणव्यतियाने अन्तरिक्षस्थस्य मिथैन् संयुक्तस्य परिमाणे परिवर्तनमभवदिति नासा वदति।

जैवतन्मात्रासु कार्बण् हैड्रजन् ओक्सिजन् इत्येतानि प्रायः भवन्ति। जीवस्य सान्निध्यस्य निदानम् एतदेव भवति।

नवदिल्ली- धर्मेण राष्ट्रं निर्वक्तुं परिश्रमः असहिष्णुतायाः कारणं स्यादिति भूतपूर्वः राष्ट्रपतिः प्रणाब् मुखर्जीवर्यः अवदत्। वयं केवलं धर्मनिरपेक्षतायामेव विश्वसिमः। भारतस्य संविधानं राष्ट्रस्य सामाजिक-आर्थिकोन्नमनस्य मुख्या समया इत्यपि प्रणब् वर्यः व्यक्तमकरोत्। राष्ट्रिय स्वयं सेवक सङ्घस्य कार्यक्रमे भागं गृहीत्वा भाषमाण आसीत् राष्ट्रपतिचरः।

धर्मेण प्रादेशिकतया विद्वेषेण च युक्तानि निर्वचनानि राष्ट्रस्याखण्डतां भञ्जयन्ति। सर्वलोकानाम् एकत्वेन दर्शनमेवास्माकं पारम्पर्यम्। धर्मनिरपेक्षता एवास्माकं धर्मः। सहिष्णुता एव भारतस्यात्मा इत्यपि स अबोधयत्। सर्वविधानि आक्रमणानि त्यजनीयानि भारतभूमौ हैन्दवानां माहम्मदानां क्रैस्तवानां च समानः अधिकारः अस्तीत्यपि प्रणाब् मुखर्जीवर्यः असूचयत्।

ग्वाट्टिमाला सिट्टि- ग्वाट्टिमालाख्ये मध्य अमेरिकाराष्ट्रे फ्यूगो अग्निपर्वतस्य स्फोटनेन मृतानां संख्या शताधिका जाता। अपघाते इतःपर्यन्तं २०० जनाः तिरोभूताः। एषां कृते मार्गणमनुवर्तते।

     ग्वाट्टिमाला नगरेण युतः अग्निपर्वतः रविवासरे रात्रावेव विस्फोटितः। स्फोटनात् परं नाडिकान् यावत् भूतिसङ्कुलं दृश्यते। अग्निपर्वतस्य समीपप्रदेशाः भूतिषु आप्लुताः अभवन्। कठिनेन धूमेन भूतिना च जनानां जीवनं दुष्करम् अभवत्। रक्षाप्रवर्तकैः बहवः जनाः समीपग्रामं नीताः। मृतदेहाः भूतिपरिवृताः दृष्टाः इति रक्षाप्रवर्तकाः अवदन्। अग्निशमनसेनाप्रभृतयः दुरन्तस्थले रक्षाप्रवर्तननिरताः सन्ति।

अमृतसर्- सुवर्णक्षेत्रे ओपरेषन् ब्लूस्टार् इति सैनिकदौत्यस्य चतुस्त्रिंशे वार्षिकसमारोहे सङ्घर्षावस्था सञ्जाता। सिख् धर्मानुयायिनां मुख्याराधनाकेन्द्रस्य अकाल् तख्द् इत्यस्य समीपमेव राडिक्किल् सिख् अङ्गैः तथा शिरोमणि गुरुद्वारा प्रबन्धकसमित्यङ्गैश्च मिथः सङ्घर्षः सञ्जातः।

     असिभिः दण्डैश्च समम् आगताः प्रवर्तकाः अकाल् तख्द्स्थे विशुद्धकेन्द्रे हमीन्दर् साहिबस्य १०० पाद दूरे सङ्घर्षावस्थामसृजन्। प्रतिषिद्धानां दूरीकरणावसरे एकं रक्षिदलाङ्गं रुग्णः अभवत्।

     १९८४ तमे वर्षे सैनिकव्यापारे आक्रमणप्रत्याक्रमणैः शताधिकाः जनाः मारिताः आसन्। तेषां स्मरणार्थं सुवर्णक्षेत्रे कार्यक्रमः आयोजितः आसीत्।

 तृशूर् – केरलराज्ये सामान्यविद्याभ्यासविभागस्य  सर्वेषु विद्यालयेषु  अतितान्त्रिकरूपेण अध्ययनमारब्धम्। एतदर्थं सामान्येन सर्वाणि सज्जीकरणानि पूर्तीकृतानि। अनेन अध्यापका‌ः नवीनां रीतिं परीक्षितुमारभन्त। उच्चभाषिणीनां वितरणं पूर्णमभवत्। छात्राः विशिष्टं पठनानुभवमेव लभन्ते इति सूचनाः वदन्ति। षष्टदिनस्य छात्रसंख्या निर्णये समाप्ते छात्रसंख्यायां महती वर्धना प्रतीक्षिता वर्तते।

तिरुवनन्तपुरम्- विश्वपरिस्थितिदिवसमालक्ष्य हरितकेरलं दौत्यं राज्ये विविधान् कार्यक्रमान् आयोजयति। परिस्थिति वातावरणविभागेन हरितकेरलं दौत्येन च संयुक्ततया अयं कार्यक्रमः आयेज्यते। दिनाचरणस्यास्य राज्यस्तरीयम् उद्घाटनं जूण् ५ दिनाङ्के सायं त्रिवादने तिरुवनन्तपुरं कनकक्कुन्न् प्रासादे शिक्षामन्त्रिणः रवीन्द्रनाथवर्यस्य आध्यक्ष्ये मुख्यमन्त्री पिणरायि विजयवर्यः निर्वक्ष्यति। वैद्युतिमन्त्री एं.एं. मणिवर्यः मुख्यभाषणं च विधास्यति। सामाजिकः के. मुरळीधरन् वर्यः तिरुवनन्तपुरं महानगरपालः अड्वक्केट् वी.के.प्रशान्तः प्रभृतयः भागभाजिनः भविष्यन्ति। परिस्थिति-जलसंरक्षणम् इति विषयमाधारीकृत्य हरितकेरलदौत्येन आय़ोज्यमानायाः इनि ञङ्ङल् परयुम् इति अनिमेषन् वीडियो परम्परायाः प्रकाशनमपि मुख्यमन्त्री विधास्यति।

बालेसोर्(ओडिषा)- एतद्देशनिर्मितम् आणववाहशेषीयुक्तं अग्नि-५ प्रक्षेपास्त्रं भारतेन अद्य सविजयं परीक्षितम्। ओडिषातीरे अब्दुल् कलां द्वीपे एव परीक्षणमभवत्। स्थलात् स्थलं प्रति प्रेष्यमाणस्य प्रक्षेपास्त्रस्य ५००० कि. मी. दूरपरिधिरस्ति। अस्य षष्टं परीक्षणं भवतीदम्। प्रथमं परीक्षणं २०१२ एप्रिल् १९ दिनाङ्के अभवत्।

      प्रक्षेपास्त्रमिदम् एकटणपरिमितं भारयुक्तम् आणवास्त्रं वोढुं प्रभवति। १७ मीट्टर् दैर्घ्यं ५० टण् भारं चास्ति अस्य प्रक्षेपास्त्रस्य। एष्या भूखण्डं सम्पूर्णम् अस्य प्रहारपरिधौ आयाति। यूरोप् आफ्रिक्का भूखण्डे भागिकत्वेन चायातः।चैना जपान् दक्षिणकोरिया उत्तरकोरिया इन्तोनेष्या ताय्लाण्ट् मलेष्या पाकिस्तान् अफ्गानिस्तान् इरान् इराख् ईजिप्त् सिरिया सुडान् लिभिया रष्या जर्मनी युक्रैन् ग्रीस् इट्टली इत्यादीनि राष्ट्राणि प्रहारपरिधावानेतुं प्रभवति इदं प्रक्षेपास्त्रम्।

कोषिक्कोट्- अपघातकारी निपा विषाणुः द्वितीयघट्टं प्रविष्टः। अनेन केरलराज्यम् आशङ्कायामस्ति। चर्मखगात् मानवं प्रविष्टः अयं विषाणुः पुनः मानवात् मानवं प्रति संक्रामति। एतदेव द्वितीयघट्टम्। एतत् स्वास्थ्य विभागेन पूर्वमेव सूचितमासीदिति स्वास्थ्यमन्त्री श्रीमती के.के. शैलजावर्या अवदत्। अतः एव जाग्रतां स्वीकर्तुम् अवकाशो लब्धः। विषाणुबाधायाः आधिक्ये एव परिशोधनायाम् अवगन्तुं शक्यते इत्येव प्रयासः।

     प्रतिरोधप्रवर्तनानि अधिकानि सज्जीकृतानि। तथापि जाग्रता आवश्यकी। निपाज्वरबाधितैः सह सम्पर्कं कृतवन्तः निश्चितकालपरिधिपर्यन्तं संघमेलनादिकं त्यजेयुः इति मन्त्री उदबोधयत्। अयं विषाणुः मस्तिष्के एव बाधते। इतः पर्यन्तं राज्ये अनेन रोगेण मृतानां संख्या १७ जाता।

तिरुवनन्तपुरम्- ग्रीष्मकालविरामानन्तरं राज्यस्थाः विद्यालयाः पुनः सक्रियाः अभवन्। आराज्यं विद्यालयेषु प्रवेशोत्सवेन सह नूतनाध्ययनवर्षं प्रति छात्रान् स्वागतीकृत्य नूतनवर्षस्य आरम्भः आघुष्यते। प्रवेशोत्सवस्य राज्यस्तरीयम् उद्घाटनं नेटुमङ्ङाट् सर्वकारीण बालिका उच्चतरविद्यालये मुख्यमन्त्री पिणरायि विजयः निरवहत्। शिक्षामन्त्री प्रोफ. सी. रवीन्द्रनाथः अध्यक्षः आसीत्।

     सामान्यविद्यालयान् श्रेष्ठतायाः केन्द्रत्वेन परिवर्तयितुं सर्वकारस्य उद्यमः महत् प्रोत्साहनं लभते इति मुख्यमन्त्री अवदत्। सर्वकारीणविद्यालयं प्रति छात्रान् प्रेषयितुं रक्षाकर्तृणाम् उत्साहः प्रवर्तनस्यास्य अङ्गीकार एव। सामान्य विद्यालयानां श्रेणी लोकोत्तरविशिष्टतां प्रापयितुं सर्वकारः यतते इत्यपि स अवदत्। छात्राः क्रीडनेन सह पठन्तु पठनं च रसकरं भवतु इति शिक्षामन्त्री अवदत्।

     अस्मिन् वर्षे द्विलक्षपरिमितं छात्राः सामान्यविद्यालयं प्राप्ताः इति प्राथमिकी सूचना। पुष्पाणि मधुराणि च दत्त्वा तान् स्वागतं कृतवन्तः।