नवदिल्ली- २०१४तः राष्ट्रं दुष्टे पथि चरति। अनेन दक्षिणेष्यायाः दुष्टतमेषु राष्ट्रेषु द्वितीयस्थानमस्ति भारतस्य इति प्रसिद्धः आर्थिकशास्त्रज्ञः अमर्त्या सेन् वर्यः अभिप्रैति। अमर्त्या सेन् तथा षाङ् देस्से च संयुक्ततया लिखितस्य “भारतं तस्य वैरुध्यता च “(India and its contridictions)इति ग्रन्थस्य चर्चायामेव नोबल्पुरस्कारजेता अमर्त्या सेन् स्वकीयमभिप्रायं प्राकटयत्।

       कार्याणि दुष्टरीत्या एव चलति। पूर्वस्मिन् काले केवलं स्वास्थ्य-शिक्षारङ्गयोः पर्याप्तां परिगणनां सर्वकाराः न ददुः। परन्तु २०१४तः पूर्णतया अनुचिते दिशि एव भारतस्य गतिऱस्ति।

          २० वर्षेभ्यः पूर्वं दक्षिणेष्यायाः षट्सु राष्ट्रेषु भारतं द्वितीयमासीत्। परन्तु अद्य पाकिस्तानस्यापि पश्चात् अतितरां दुष्टामवस्थामन्ववाप।

    विश्वे द्रुतं प्रवर्धमाना आर्थिकव्यवस्था एव भारतस्यास्ति। तथापि भारतस्य पश्चाद्गमनं प्रति तस्य वैरुध्यमेव स सूचयति स्म। जातिव्यवस्था असमत्वं दलितसमस्याः इत्येतेषु विषयेषु सर्वकारः पराङ्मुखो भवति। विपक्षाणामैक्यम् अनिवार्यमेव, तत्तु व्यक्तीनां मिथः युद्धरूपेण न द्रष्टव्य इत्यपि अमर्त्या सेन् अब्रवीत्।

तृप्रयार्- कस्यचन तन्तुवायस्य पुत्रः एकस्यः परम्परायाः जीवनवयने प्रशिक्षणं करोति। तमिल् नाटु तिरुवल्लूर् जनपदे वेलिगरं सर्वकारीय उच्चविद्यालये आङ्गलभाषाध्यापकः गोविन्द भगवान् एटमुट्टं श्रीनारायणमण्डपे शतमितां छात्राणाम् आत्मविश्वासं द्रढयितुम् आगतवान्।

समीपकाले कस्यचन अध्यापकस्य विद्यालयपरिवर्तनं राष्ट्रियश्रद्धामाचकर्ष। स अध्यापकः भवति श्री गोविन्द भगवान्। आलिङ्गनेन आक्रन्दनेन च साकं वेलिगर विद्यालयस्थाः छात्राः भगवान् वर्यं प्रतिरुरुधुः। रक्षाकर्तारः अपि छात्रैः साकमतिष्ठन्। कुतः अस्मिन्नध्यापके छात्राः एवं स्निह्यन्ति इति द्विहोरावधिकेन समयेन अवागच्छन्।

छात्राः विद्यालयं शिक्षकान् च सुहृत् रूपेण पश्यन्तु इति भगवान् छात्रानबोधयत्। अध्यापकाः अपि तथा एव भवेयु‌ः। न केवलं पाठपुस्तकस्थान् पाठान् अपि तु छात्राणां समग्रासु मेखलासु अध्यापकाः यथार्थगुरवः भवेयुः। प्रश्नानां प्रतिवचनं हर्षारवेण सह छात्राः अङ्गीकृतवन्तः। विद्यालये कनिष्ठः अध्यापकः भवति भगवान्। तथापि छात्राः सहप्रवर्तकाः रक्षाकर्तारश्च तं स्नेहेन परिगणयन्ति।

बाल्टिमोर्- केरलमुख्यमन्त्रिणं पिणरायिविजयवर्यम् अमेरिक्कायां बाल्टिमोरस्थः मानवविषाणुपठनसंस्था (Institute of Human Virology) बह्वमन्यत। निपा विषाणुबाधायाः प्रतिरोधार्थं केरलसर्वकारस्य फलप्रदम् उद्यमं पुरस्कृत्यैव एष समादरः। ऐ.एच्.वी. संस्थायाः स्थापकः तथा वैद्यशास्त्रगवेषकः डो. रोबर्ट गेलो मुख्यमन्त्रिणे उपहारं समार्पयत्। एय्ड्स् रोगस्य कारणभूतस्य एच.ऐ.वी. विषाणोः प्रवर्तनम् अनावृते शास्त्रसंघे प्रमुखो भवति डो. गेलो। स्वास्थ्यमन्त्री के.के. शैलजावर्यापि कार्यक्रमे भागमभजत।

     स्वास्थ्यरङगे केरलेन अन्ताराष्ट्रतले लभ्यमानः उन्नता बहुमतिरेवेयम्। १९९६ तमे वर्षे स्थापिता संस्था इदं प्रथमतया कंचन सामाजिकं बहुमनुते। निपा प्रतिरोधार्थं केरलसर्वकारेण स्वीकृतम् बहुमुखम् उद्यमं विशकलय्य एव ऐ.एच्.वी. संस्था मुख्यमन्त्रिणम् आमन्त्रयितुं निरणयत्। विश्वप्रशस्तानां शास्त्रज्ञानां प्रवर्तनकेन्द्रं भवति मानव विषाणुपठनसंस्था।

नवदिल्ली- आराधनालयेषु दुराचारः अवमाननं प्रभृतिषु आक्षेपेषु जनपदप्राड्विवाकम् उपगन्तुं भक्तानाम् अधिकारः अस्तीति सर्वोच्चन्यायालयः। धर्मः को/पि भवतु, तत्र आराधनालयानां भरणं प्रचालनं शुचित्वं धर्म्यसंरक्षणं वस्त्रसम्बन्धिनः आचाराः इत्यादिषु विषयेषु आक्षेपःअस्ति चेत् जनपदप्राड्विवाकम् आवेदयितुं शक्यते। प्राड्विवाकः आवेदनमधिकृत्य अन्वेषणं कृत्वा उच्चन्यायालयम् आवेदयति। उच्चन्यायालयः एतत् सामान्यतात्पर्यरूपेण परिगणय्य आदेशं दद्यात् इति न्यायाधिपौ ए.के. गोयल् अब्दुल् बषीर् इत्येतयोः संवेशनम् आदेशमदात्।

     ओडीषायां पुरी जगन्नाथमन्दिरे धर्म-जातिपरिगणनां विना सर्वेषां विश्वासिनां प्रवेशानुमतिं दत्वा  सूचिते विधिनिर्णये एवायं निर्देशः।

कोच्ची- एरणाकुलं महाराजकलालयछात्रस्य अभिमन्योः हत्यायाः पश्चात्तले तीव्रवादिनां सान्निध्यमस्तीति आरक्षिदलस्य निगमनम्। अस्मिन् व्यवहारे अन्तर्भूतानामुपरि राष्ट्रविरुद्धप्रवर्तन-निरोधन-नियमस्य(यू.ए.पी.ए.)आधारेण अपराधपत्रं दातुं आरक्षिदलनिदेशकः नियमोपदेशं प्रार्थयत। अस्मिन् हत्यायां तीव्रवादबन्धमालक्ष्य एन.ऐ.ए. अपि अन्वेषणम् आरभत।

     केच्चीदेशमागतः आरक्षिदलनिदेशकः लोकनाथबेह्रा वर्यः गृहीतान् पर्यपृच्छत्। अन्वेषणसङ्घेन सह स चर्चामपि अकरोत्। अभिमन्योः हत्या आसूत्रिता एवेति रक्षिदलस्य निगमनम्।

बाङ्कोक्- ताय्लेण्ट् राष्ट्रे गुहायां अन्तर्भूय दशमे दिने सजीवशेषं दृष्टान् १२ बालकान् प्रशिक्षकं च त्रातुं मासान् यावत् कालविलम्भः स्यात्। गुहायां जलोपप्लवकारणात् ते महाशिलायाम् अभयं प्राप्ताः। नूतनं रक्षाप्रवर्तनरीतिम् अवलम्भ्यैव तान् बहिरानेतुं शक्यते। एवं चेत् चतुर्मासावधि तेषां कृते भाजनपानीयादीनि प्रापणीयानि भवन्ति।

जलोपप्लवेन जलान्तर्भागतरणं तान् परिशीलनीयम्। तर्ह्येव तान् बहिरानेतुं शक्यते। अन्यथा जलनिम्नतापर्यन्तं प्रतिपालनीयम्। प्रथममार्गं स्वीकर्तुं पर्याप्तं स्वास्थ्यं छात्राणां नास्ति।

तिरुवनन्तपुरम्-निपा विषाणोः प्रभवः फलभोजी चर्मखगः इति स्थिरीकृतम्। ऐ.सी.एम्.आर्. परीक्षणे एवेदं कार्यम् अवगतम्। केन्द्र स्वास्थ्यमन्त्री जे.पी. नद्दावर्यः कार्यमेतत् स्थिरीकृतवान्। एकस्य राष्ट्रिय वार्तामाध्यमस्य कृते दत्ते अभिमुखे तानेदं स्थिरीकृतम्। पूर्वं षट्पदादचर्मखगेषु कृते परीक्षणे निपा विषाणोः सान्निध्यं न दृष्टमासीत्। पुनः निपाबाधितानां गृहसमीपात् गृहीतेषु फलादचर्मखगेषु कृते परीक्षणे एव प्रभवस्थानं स्थिरीकृतम्।

कण्णूर्- पारिस्थितिकावबोधयुक्तां जनततिं संस्रष्टुं जीवनं पद्धतिः। छात्राः पठनेन साकं एकवर्षपर्यन्तं परिस्थित्प्रवर्तनान्यपि स्वीकुर्वन्ति। अस्याः पद्धतेः शुभारम्भः शिक्षामन्त्रिणा कृतः। कण्णूर् कल्याश्शेरि नियोजकमण्डलस्य समग्र शिक्षापद्धतेः भागत्वेनैव जीवनम् आयोज्यते। परिस्थितिबोधेन सह जीवनरीतिरूपीकरणस्य केन्द्रत्वेन विद्यालयाः परिवर्तनीया इति पद्धतेः लक्ष्यम्।

छात्राणां पठनमेखलायाः परिपोषरीत्यां तथा दैनंदिनप्रवर्तनेषु प्रतिफलनरीत्यां च पद्धतिराविष्कृता।

कोच्ची- एरणाकुलं महाराजास् कलालये स्नातकछात्रः तथा एस्.एफ्.ऐ. इति छात्रसङ्घस्य प्रवर्तकश्च अभिमन्यु इति छात्रस्य हत्याविषये अपराधिनां दण्डनम् अचिरेणैव भविष्यतीति मुख्यमन्त्री पिणरायि विजयः अवदत्। एतदर्थं रक्षिदलं निरदिशदिति सो/सूचयत्।
इतः पर्यन्तं त्रयः निगृहीताः। अत्यन्तम् अपलपनीयं कार्यमेव महाराजकलालये आपतितम्। हत्या आसूत्रिता एवासीदिति रक्षिदलानां प्राथमिकान्वेषणे ज्ञातमस्ति। कलालयात् बहिस्थिताः आतङ्कवादिनः एव हत्यामकुर्वन्। आतङ्कवादं विरुध्य धर्मनिरपेक्षसमाजैः जागरूकैः भाव्यमित्यपि मुख्यमन्त्री अवदत्।

कोटकरा- एषः कोटकरा काविल्परम्पिल् काञ्जिरप्परम्पु मठत्तिल् शङ्करनारायणन् कर्ता इति संस्कृतशिक्षकः। तृप्पूणित्तुरा सर्वकारीय संस्कृतोच्चतरविद्यालये शिक्षकः तथा प्रांशुपालस्य धुरां च वहति। वाचनपक्षाचरणस्य भागत्वेन कोटकरा ग्रामपञ्चायत् ग्रन्थालये अयुतमितैः संस्कृतग्रन्थैः साकं स प्राविशत्।

     १९४८ तमे वर्षे कोल्कत्ता बाट्टिष् मिषन् संस्कृतपण्डितैः कारयितः प्राचीनसंस्कृतबैबिल् ग्रन्थादयः अत्यपूर्वग्रन्थाः स्वकीये युतककोशे अङ्कीयरूपेण वहति अयं महानुभावः। सङ्गणकस्य बाह्ययन्त्रांशे समाहृताः भवन्त्येते ग्रन्थाः। मलयाल-आङ्गलप्रभृतिषु भाषासु रचिताः शताधिकाः ग्रन्थाः आनुकालिक्यः कलाग्रन्थाः यात्राविवरणानि तथा क्षेत्रकलानां चलनचित्राणि गानानि चस्मिन्नपूर्वे सञ्चये वर्तन्ते। एते ग्रन्थाः अयम् अङ्कीय रूपेण प्रतिकृतिं स्वीकृत्य ग्रन्थशालायै अदात्। अधुनायं भक्तिकाव्येषु अद्वैतस्य स्थानम् इति विषये अनुसन्धानं कुर्वन्नस्ति।

     संस्कृते मलयाले च बह्यः कविताः अनेन रचिताः। कोटकरा पूनिलार् काविलम्मा स्तोत्रस्य कर्तापि अयमेव। काव्यरचनायाः ऋते अक्षरश्लोके/पि तत्परो/यं पुराण कृतिषु आधुनिककृतिषु च प्रवीणः भवति।