Daily Archives: May 14, 2018
छात्राणां कृते विशिष्टा सूचना।
निदाघविरामानन्तरं केरलस्थेषु विद्यालयेषु जूण् प्रथमे दिनाङ्के शुक्रवासरे एव कक्ष्या आरभ्यते। द्वितीये दिने शनिवासरे/कक्ष्या भविष्यति। एतत्सम्बन्धि औद्योगिकं प्रख्यापनम् अस्मिन् सप्ताहे एव भविता। नवीनं विद्याभ्यास नियममनुसृत्य मध्याह्नभोजनवितरणार्थं केन्द्रसर्वकारात् धनादेशं प्राप्तुं विद्यालयेषु २२० प्रवृत्तिदिनमावश्यकं भवति। अत एवायं निर्णय़ः। अस्मिन् अध्ययनवर्षे अधिकाः शनिवासराः प्रवृत्तिदिनत्वेन परिगणनीया भवेयुः।
चलचित्र-नाटकनटः कलाशाला बाबू दिवंगतः।
कोच्ची- चलचित्रेषु नाटकेषु दूरदर्शनधारावाहिकासु च अभिनयप्रतिभां प्रदर्शितः नटः कलाशाला बाबू दिवंगतः। मस्तिष्काघातकारणात् एरणाकुलस्थे निजीयचिकित्सालये आसीत् अस्यान्त्यम्। हृदयसम्बन्धेन आमयेन समीपकाले चिकित्सायामासीत्। चलचित्रेषु सहनटरूपेण प्रतिनायक रूपेण चास्य अभिनयपाटवम् अतुल्यमासीत्। नाटकरंगे स्वीयां प्रतिभां प्रकटयन्नयं चलचित्रलोकमागतः।
कथाकेलिमण्डले प्रसिद्धः आचार्यः कलामण्डलं कृष्णन् नायर् तथा मोहिनियाट्ट रंगे प्रसिद्धा नर्तकी कलामण्डलं कल्याणिक्कुट्टियम्मा चास्य पितरौ। नैकासु दूरदर्शनधारावाहिकासु चाभिनीय अयं स्वकीयामतुलां प्रतिभां प्राकटयत्।
