मुम्बै – सञ्जय् लील बन्साली वर्यस्य पद्मावत् इति चलचित्रं प्रेक्षागारं प्रति मुक्तिमनुबन्ध्य अस्य मासस्य २५ तमे दिनाङ्के आभारतं पिधानसमरमायोजयितुं सन्नद्धास्ति रजपुत् कर्णिसेना। यदि तद्दिने चित्रं प्रदर्शयति तर्हि प्रेक्षागारम् अग्निसात्करिष्यतीति सेनाध्यक्षः लोकेनद्र सिंहः आहवमकरोत्।तादृशं नष्टं सोढुं प्रेक्षागारस्वामिनः सिद्धा भवेयुः इत्यपि सो/सूचयत्। पूर्वं चलचित्रस्य निदेशकं सञ्जय् लील बन्सालिं तथा नायिका दीपिका पदुकोणे वर्यां च हनिष्यति इति भीषा लोकेन्द्रसिंहेन कृता आसीत्। गुजरात् राज्ये चित्रं न प्रदर्शयिष्यति इति सेनायाः वादः।

श्रीनगरम् – काश्मीरराज्ये पाकिस्तानेन कृते भुषुण्डिप्रयोगे एकं भारतसैनिकमुपादाय त्रयः जनाः मारिताः। पञ्चाब् देशीयः मन्दीप सिंह् इति सैनिक एव मारितः। पाकिस्तानस्य भुषुण्डिप्रयोगे कवचशस्त्राक्रमणे च भारतं सुशक्तं प्रत्यकरोत्। भुषुण्डिप्रयोगः अधुनापि अनुवर्तते इति सूचना। शुक्रवासरे पाकिस्तानस्य आक्रमणे एकं केरलीयमुपादाय द्वौ सीमासुरक्षाबलसैनिकौ द्वौ ग्रामीणौ च मृताः आसन्।

तिरुवनन्तपुरम् – विषिञ्ञं नौकाश्रयपरियोजनायां अभिज्ञापत्रे केरलसर्वकारेण सह हस्ताक्षराङ्कितः अदानि पोर्ट मुख्यकार्यान्वयनाधिकारी सन्तोष् महापत्रा वर्यः स्वस्थानम् अत्यजत्। स अस्याः पद्धतेः समारम्भाय सज्जतां कृतवानासीत्। वैयक्तिकेन कारणेन स्थानं त्यजतीति स विशदीकरोति। परन्तु पद्धतेः मन्दगमने अतृप्तः सन्नेव स त्यागपत्रमदात् इति सूचना।

नवदिल्ली – सञ्जय् लील बन्साली इति प्रसिद्धस्य चलचित्रनिदेशकस्य पद्मावत् इति हिन्दी चलचित्रे विरोधाय किमपि नास्तीति आद्मीयगुरुः श्री श्री रविशङ्कर् वर्यः अभिप्रैति स्म। गुरोः बङ्गलूरुस्थे आश्रमे चलचित्रस्यास्य विशेषप्रदर्शनं प्राचलत्। जनुवरी १५ दिनाङ्के एव प्रदर्शनमायोजितम्।तदन्तरमेव गुरुः चित्रमधिकृत्य स्वाभिप्रायं प्राकटयत्। राणी पद्मावतीं प्रति आदरपूर्णम् इदं चलचित्रं जनैः विरुद्धमिति विज्ञाय गुरुः आश्चर्यं प्रकटितवान्।चलचित्रस्यास्य विषयः अभिमानास्पद इति गुरुःप्रावोचत्।

नवदिल्ली – संस्कृतं पठेच्चेत् स्मृतेः वर्धनं भवेदिति अनुसन्धानफलम्। नाडीशास्त्रज्ञः जेयिंस् हार्ट्सेल् वर्यः एतदधिकृत्य सूचना सइन्टिफिक् अमेरिक्कन् जेर्णल् इति पत्रिकायां प्रकाशितवान्।

     संस्कृतस्य लेखनेन पठनेन अध्ययनेन च चिन्ताशक्तिः वर्धते बुद्धिश्च विकसति। इत्येव हार्ट्सेलस्य वादः। शास्त्रीयरीत्या यजुर्नेदं पठितान् पण्डितानेव स अनुसन्धानार्थं चितवान्। चितेषु ४२ अङ्गेषु २१ जनाः संस्कृतपण्डिताः आसन्। द्वयोः विभागयोः स्मृतिं धिषणां च अङ्कयन्नेव गवेषणफलं सज्जीकृतम्। स्वतन्त्ररूपेण चिन्तनार्थं संस्कृतं सहायकमिति स्वानुभवं पुरस्कृत्य स समर्थितवान्।

नवदिल्ली – मुख्यन्यायाधीशं विरुद्ध्य चत्वारः वरिष्ठन्यायाधिपाः वार्ताहरसम्मेलनमकुर्वन्निति विषये सर्वोच्चन्यायालये प्रतिसन्धिपरिहारार्थं चर्चा अद्यापि अनुवर्तते। अद्य मध्याह्ने मुख्यन्यायाधीशः अन्यैः न्यायाधिपैः साकं भोजनं करिष्यति। एतन्मध्ये विवादविषयान् चर्चया परिहरिष्यति इति न्यायाधिपाः असूचयन्। गतदिने मुख्यन्यायाधीशः चतुर्भिः न्यायाधिपैः साकं चर्चामकरोत्। तस्यानुस्यूततया अद्यतनी चर्चा।

     तदन्तरे सी.बी.ऐ. न्यायालयस्य न्यायाधिपस्य बी.एच्. लोया वर्यस्य दुरूहमरणसम्बन्धिनम् आवेदनं परिगण्यमानात् व्यूहात् न्यायाधिपः अरुण् मिश्रा प्रतिन्वृत्तः। कनिष्ठं तं एतद्ववहारपरिगणनायां न्ययोजयत् इति विषये चत्वारः न्यायाधिपाः प्रतिषेधे आसीत्। अस्मिन् साहचर्ये प्रश्नपरिहारार्थं ज. मिश्रा व्यवहारात् प्रतिनिवृत्तः इति सूचना अस्ति।

तिरुनन्तपुरम् – आगामिनि आध्ययनवर्षस्य विद्यालयीय पाठपुस्तकस्य वितरणं समारब्धम्। तिरुवनन्तपुरं कोल्लं, एरणाकुलं, मलप्पुरं,कोषिक्कोट्,कण्णूर् जनपदानां कृते एव अधुना वितरणं प्रतलति। मार्च् मासात् पूर्वं सर्वेषु विद्यालयेषु पुस्तकं प्रापयितुमुद्यम एवायम्। प्रथमभागत्वेन ३.२ कोटि पाठपुस्तकानि आवश्यकानि। मुद्रणम् अन्तिमे घट्टे भवति। सार्धैककोटि परिमितानां पुस्तकानां प्रबन्धनप्रवृत्तिः पुरोगच्छति। सर्वेषु विद्यालयेषु के.बी.पि.एस्. संस्था पुस्तकानि प्रापयति।

आग्रा – भारत-इस्रायेल् सौहृदस्य नूतनं परिमाणं दत्वा इस्रायेल् प्रधानमन्त्री बञ्चमिन् नेतन्याहू तस्य पत्नी सारा च ताजमहल् सन्दर्शितौ। ताजमहलस्य पुरतः शुभ्रशिला आसन्दे उपविश्य छायाचित्रं स्वीकृत्य द्वावपि प्रतिनिवृतै।

     षड्दिवसीयं भारतसन्दर्शनं कर्तुं ह्यः आगतौ नेतन्याहू पत्नी सारा च अद्य ११.१५ वादने उत्तरप्रदेशं प्राप्तौ। मुख्यमन्त्री योगी आदित्यनाथः आगत्य ताजमहलस्य इतिहासप्राधान्यं वास्तुविद्यावैभवं च नेतन्याहूं परिचितवान्।

     पञ्चदशवर्षानन्तरमेव इस्रायेल् प्रधानमन्त्री भारतमायाति। २००३ सेप्तम्बर् मासे तदानीन्तन प्रधानमन्त्री एरियल् षारोण् वर्यः भारतं सन्दर्शितवानासीत्।

मुम्बै- सोह्राबुद्दीन् व्याजसङ्घर्षव्यवहारे प्राड्विवाकपदवीमलंकृतस्य न्यायाधिपस्य बी.एच्. लोया वर्यस्य दुरूहमरणम् अन्वेष्टव्यमिति तस्य बन्धुः श्रीनिवासलोया वर्यःअवदत्। मरणे दुरूहता नास्तीति न्यायाधिपस्य लोयावर्यस्य पुत्रस्य अनूज्लोयस्य प्रस्तावना प्रेरणयैवेति श्रीनिवास लोयस्य वादः। अनूज् लोया युवक एव, पितुः मरणसमये स किशोरावस्थायामेवासीत्। बाह्यप्रेरणया एव तस्य तादृशं प्रतिकरणमिति मन्ये इत्यपि कारवन् मासपत्रिकायाःकृते दत्ते अभिमुखे स अवदत्।

     सोह्राबुद्दीन् व्याजसङ्घर्षव्यवहारे बी.एच्. लोया वर्य एव न्यायालये वादमशृणोत्। तस्मिन् व्यवहारे भा.ज.पा. दलस्याध्यक्षः आमित् षा वर्यःअभिशस्तकः आसीत्। सहन्यायाधिपस्य पुत्र्याः विवाहे भागं भजितुं गतः लोया वर्यः २०१४ दिसम्बर् प्रथमे दिने हृदयाघातेन मृतः इति पारिवारिकेभ्यः सूचना दत्ता। परन्तु प्रेतपरिशोधनायां तादृशं कारणं नावगतम्। अतः बान्धवाः संशयालवः जातः। व्यवहारे अमित्षा वर्याय अनुकूलविधिसम्पादनार्थं १०० कोटि रूप्यकाणां पारितोषिकं न्यायाधिपाय वाग्दत्तम्। परन्तु स तन्निरस्तवान्, ततः परं एकसप्ताहाभ्यन्तरे लोयावर्यः दुरूहसाहचर्ये मृतः इति पारिवारिकाणां वादः।

     सोह्राबुद्दीन् व्याजसङ्घर्षसमये गुजरात् राज्ये गृहमन्त्री आसीत् अमित् षा वर्यः