नवदिल्ली – रेलमन्त्री पीयुषगोयलः अब्रवीत् यत् रेलयात्रां भूयो∫पि सुरक्षान्वितां विधातुं सुरक्षोपायानाम् अन्वेषणार्थं रेलविभागः अन्तरीक्षानुसन्धानसंघटनेन सह संभूय कार्यमाचरति। श्री गोयलः व्याहरत् यदसौ विषये∫स्मिन् कतिपयदिवसपूर्वं भारतीयान्तरीक्षानुसन्धानसंघटनस्य अध्यक्षं ए.एस् किरणकुमारम् अमिलत्।

नवदिल्ली – २०१७ वर्षान्त्येन दूरदर्शनस्य भौमसम्प्रेषणं समाप्तिम् एष्यति। शुक्रवासरे प्रवृत्ते प्रसार् भारती संसंथायाः उन्नते अधिवेशने अयं निर्णयः जातः। पूर्वम् एतदर्थं पर्यालोचना प्रवृत्ता तथापि निर्णयो न जातः। अधुना ट्विट्टर् माध्यमेन प्रसार् भारती अधिकृतैः एष निर्णयः प्रकाशितः। भौमसम्प्रेषणस्य प्रेक्षकाणां न्यूनता तथा राष्ट्रस्य विविधभागस्थानां सम्प्रेषणस्तूपानां परिपालनाय अधिकव्ययश्च एतस्य निर्णयस्य हेतुः। राष्ट्रे १४१२ भौमस्तूपाः इतःपर्यन्तं प्रसार् भारती संस्थया स्थापिताः।

नरेन्द्रमोदी सर्वकारस्य मुद्रानिरोधः दुरन्तः आसीदिति भूतपूर्वः केन्द्रमन्त्री भा.ज.पा.दलस्य नेता च श्रीमान् यश्वन्त सिन्हा महोदयः अवदत्। आर्थिकमाद्यं प्रति राष्ट्रस्य गतौ दले बहवः नेतारः प्रवर्तकाश्च अतृप्ताः इत्यपि तेन निगदितम्। आगोलविपण्यां मृत्तैलमूल्यं न्यूनमभवत्। तथापि तस्मात् धनं समाहृत्य आर्थिकघटनां पुनरुज्जीवयितुं वित्तमन्त्री किमपि नाकरोत्।तस्मिन् विषये पराजितः अभवत् धनमन्त्री इति स सूचितवान्। वाजपेयी सर्वकारे वित्तमन्त्री आसीत् यश्वन्त सिन्हा।

काश्मीरे पैलट् भुशुण्डिकायाः दुष्प्रयोगविषयकस्य मिथ्यारोपस्य प्रमापनार्थं कस्याश्चित् गासा-क्षेत्रीयायाः युद्धाहतबालिकायाः कपटचित्रं संयुक्तराष्ट्रे सद्य प्रस्तुतवान् पाकिस्तानदेशः भारतेन गतदिने सार्वजिकरूपेण  पुनरेकवारं धिक्कृतः। संयुक्तराष्ट्रमहासभायाः वार्षिकाधिवेशने प्रत्युत्तराधिकारं प्रयुज्यमाना तत्रत्या भारतीया प्रतिनिधिः पौलोमी त्रिपाठी पाक्द्वारा प्रस्तुतस्य उक्तारोपस्य सन्दर्भे वास्तविकं प्रस्तावयन्ती अवदत् यत् अस्मिन् सन्दर्भे स्थितिः सर्वथा विपरीता विद्यते।

नवदिल्ली – १९१९ वर्षस्य मार्चमासपर्यन्तं सकलानि विद्युदापूर्ति-शून्यानि गृहाणि विद्यूद्दीपैः दीपयितुं प्रधानमन्त्रिणा गतदिने प्रधानमन्त्री-सहज-बिजली-हर-घर-योजना प्रख्यापिता।

उत्तरप्रदेशे बनारस्-हिन्दु विश्वविद्यालयीय-छात्राणाम् उग्रमान्देलनम् अभिलक्ष्य रज्ये सकलाः शैक्षिकसंस्थाः ओक्टोबर् मासस्य द्वितीयदिनाङ्कं यावत् पिहिताः। एतद्विश्वविद्यालयीय-परिसरे गतगुरुवासरीय रात्रौ कयाचिच्छात्रया सार्धं सञ्जातं संघर्षं विरुद्ध्य विगतेभ्यः पञ्चदिवसेभ्यः छात्राभिः निरन्तरमुग्रमान्दोलनं प्रवर्त्यते।

षार्जा इति अरब् राष्ट्रस्य प्रशासकः डो. षेय्क् सुल्तान् बिन् मुहम्मद् अल् खादिमिवर्यः पञ्चदिवसीयपर्यटनार्थम् अद्य केरलदेशमागतः। कोच्चिन् विमानपत्तने मुख्यमन्त्रिणः पिणरायि विजयस्य नेतृत्वे मन्त्रिसभाङ्गैः तस्मै ऊष्मलं स्वीकरणमायोजितम्। सप्तम्बर् २४ तः २८ पर्यन्तं सः केरलेषु पर्यटनं विधास्यति। २५ तमे दिनाङके राजभवने राज्यपालेन सह मेलनं ततः मुख्यमन्त्रिणा अन्यैः मन्त्रिभिश्च सह साक्षात्कारश्च भविष्यति। तस्य कृते कोवलं लीला राविक्स् इति अट्टपुर्यां सांस्कृतिककार्यक्रमोपि आयोजितः वर्तते।

नवदिल्ली – गतरात्रौ संयुक्तराष्ट्रमहासभायाः वार्षिकम् अधिवेशनं संबोधयन्ती विदेशमन्त्री सुषमास्वराजः भारतं विरुद्ध्य  युद्धप्रोत्साहनार्थं प्रतिवेशिदेशः समाक्षिप्तः। श्रीमती स्वराजः अब्रवीत् यत् जगति आतङ्क-हत्यादीनां अमानवीयकृत्यानां कुख्यातः अधिनायकः देशः अद्य भारताय मानविकतायाः उपदेशान् प्रयच्छति।

नवदिल्ली – प्रधानमन्त्री नरेन्द्रमोदी आकाशवाण्याः मन् की बात् इति कार्यक्रमे श्वः एकादशवादने स्वीय-विचारान् प्रस्तोष्यति। त्रिषष्टितमा शृङ्खलेयं भविता। अनेन सहैव अस्य कार्यक्रमस्य त्रीणि वर्षाणि सम्पूर्यन्ते।