नवदिल्ली- कोरोणा विषाणोः व्यापनस्य भूमिकायां 2020 शून्याध्ययनवर्षत्वेन परिगणयितुं केन्द्रीय शिक्षामन्त्रालयस्य पर्यालोचना। अधुनातनं साहचर्यं अनुकूलं नास्तीति विचारविमर्शकारणेनैवायं निर्णयः। परं कलालयेषु विद्यालयेषु च वार्षिकं मूल्यनिर्णयम् आयोजयितुं शक्यते इति प्रतीक्षा असेतीति केन्द्र मानवशेषीविभागस्य सचिवः अमित् खरे वर्यः मानवविभवशेषीविभागस्य संसदीयस्थिरसमित्यधिवेशने प्रतीक्षां प्राकटयत्।

     अध्ययनवर्षम् अनुपेक्ष्य वार्षिकपरीक्षापूर्तये एव अधुना पर्यालोचना। प्रथमकक्ष्यातः द्वादशकक्षायापर्यन्तं  पठितवत्सु छात्रेषु षष्टिप्रतिशतं छात्राः सद्यस्कसेवा द्वारा पठितुं पारयन्ति। त्रिंशत् प्रतिशतं छात्राणां कृते रेडियो, टेलिविजन् प्रभृतीनि परिमितानि सौविध्यान्येव सन्ति। दशप्रतिशतं छात्राः सद्यस्कसेवाद्वारा कक्ष्यायां भागं गृहीतुं न शक्नुवन्ति इति सर्वेक्षणसूचना अस्ति।

     सम्पूर्णपिधानगात् परं पिहितान्  विद्यालयान्  पदे पदे पुनरुद्घाटयितुं पूर्वं निर्णयमासीत्। परन्तु विद्यालयानां पुनरुद्घाटनाय समयः न अनुकूलः इति विचिन्तनस्य आधारेण स निरणयः त्यक्तः।

कोट्टयम्- मध्यकेरलेषु दक्षिणकेरलेषु च कठिना वृष्टिः। पम्पा, अच्चन् कोविल्, मणिमला, मीनच्चिल् प्रभृतयः मध्यकेरलस्थाः नद्यः कूलङ्कषाः सञ्जाताः। पत्तनंतिट्टा, कोट्टयं प्रभृतिषु स्थलेषु निम्नप्रदेशाः जलैराप्लाविताः अभवन्। जलश्रेणिषु ऊर्ध्वं गच्छत्सु कुट्टनाट् प्रदेशे दुरिताश्वासशिबिराणि समारब्धानि।

पाला, कोट्टयं नगरयोः निम्नप्रदेशाः जलैराच्छादिताः। अयर्कुन्नं पेरूर् प्रभृतिभ्यः प्रदेशेभ्यः जनाः सुरक्षितदेशं नीताः। कुमरकं, अय्मनं, तिरुवार्प्, आर्पूक्करा पञ्चायत् स्थलेष्वपि जलोपप्लवः अभवत्।

इटुक्की मण्डले अद्यापि शोणजागरूकता घोषिता। परन्तु प्रातःकाले अतितीव्रवृष्टिः तत्र न जाता। मुल्लप्परियार् जलबन्धे जलश्रेणी उन्नता जाता। अनेन जागरूकतायै पेरियार् तटेषु अधिवसतः जनान् अधिकृताः असूचयन्।

आलप्पुषा मण्डले जलोपप्लवः अधिकतया दृश्यते। तत्र वृष्टेः ईषत्शमनमस्ति। तथापि पूर्वभागादागतैः जलपूरैः कुट्टनाट् प्रदेशस्थानि गृहाणि जलान्तर्भूतानि अभवन्।

करिप्पूर्- कोषिक्कोट् अन्ताराष्ट्रविमानपत्तने एयर् इन्ड्या एक्स्प्रस् विमानं अवतारणावसरे धावनमार्गात् स्खलित्वा अपघाते आपतितम्। दुबाय् देशात् कोषिक्कोट् पर्यन्तं आगतं विमानमेव एवम् अपघाते पतितम्। अपघाते विमानं द्विधा भग्नम् इत्यावेद्यते। ए.ऐ.१३४४ विमानं रात्रौ ७.४५ वादने एव मार्गात् स्खलितम्। अपघाते एकेन वैमानिकेन सह दश मृताः इति श्रूयते। बहवः रुग्णाः संजाताः। रुग्णान् चिकित्सालयं प्रावेशयत्। तेषु केचन अतितीव्रावस्थायां सन्ति। विमाने आहत्य १९१ यात्रिकाः आसन्।

तृशूर्- ओल्लूर् तैक्काट्टुश्सेरि ग्रामं विश्वप्रसिद्धं कृतवान् वैद्यश्रेष्ठः इ.टि. नारायणन् मूस् वर्यः कालयवनिकायाम् अन्तरधात्। स ८७ वयस्कः आसीत्। वैद्यरत्नम् इति व्यापारमुद्रितस्थापनानाम् अध्यक्षः तथा प्रबन्धननिदेशकश्चासीदयम्।

तैक्काट्टुश्शेरि एलेटत्त् तैक्काट् नीलकण्डन् मूस् देवकी अन्तर्जनं दम्पत्योः दशसु अपत्येषु एक एव पुत्रः अयं १९३३ सेप्तम्बर् १५ दिनाङ्के भूजातः अभवत्।

आयुर्वेदचिकित्सामण्डले अस्य समुन्नतं योगदानं परिकल्प्य राष्ट्रं तं पद्मभूषण् पुरस्कारेण बह्वमन्यत। अपि च प्रधानमन्त्रिणः स्वदेशीपुरस्कारेणापि अयं समादृतः।

केरलेषु प्राचीनकाले १६ अष्टवैद्यपरिवाराः आसन्। अधुना तु केवलं षडेव सन्ति। तेषु प्रमुखः भवति ब्रिट्टीष् सर्वकारेण वैद्यरत्नम् इति बहुमानितः एलेटत्त् मन। १९४१ तमे वर्षे पित्रा स्थापिता आसीत् वैद्यरत्नम् औषधशाला। १९५४ तमे वर्षे नारायणन् मूस् वर्यः तस्याः शालायाः सारथ्यमावहत्। अधुना वैद्यककलालयप्रभृतीनां बहूनां संस्थानां नियन्त्रणं वैद्यरत्नम् इति संधेन क्रियते।

दिल्ली- आयोध्यायां श्रीरांमन्दिरनिर्माणं श्वः आरभते। प्रधानमन्त्रिणः सन्दर्शनमभिलक्ष्य मन्दिरनगर्याः सुरक्षा केन्द्रसेनया स्वायत्तीकृता। कोविड् महामार्याः करालहस्तेपि अयोध्यानगरं मन्दिरभूमिपूजार्थं सज्जमभवत्। श्वः एकादशवादनेन प्रधानमन्त्री नरेन्द्रमोदीवर्यः मन्दिरनगरीं प्राप्स्यति। प्रथमं हनूमान् मन्दिरं प्राप्य तत्र प्रधानमन्त्री दशनिमेषपर्यन्तं स्थास्यति। ततः सार्धैकादशवादने मन्दिरभूमिपूजासमारोहे भागं गृहीष्यति। भूमिपूजानन्तरं मन्दिराङ्गणे प्रधानमन्त्री  पारिजातवृक्षं रोपयिष्यति।

    उत्तरप्रदेशमुख्यमन्त्रिणमभिव्याप्य पञ्च जनाः एव प्रधानमन्त्रिणा साकं वेदिकायां भविष्यति। 150 आमन्त्रितेषु 133 जनाः सन्यासिनः भवन्ति। एतैः सह उत्तरप्रदेशस्य सुन्नी वखफ् बोर्ड् अध्यक्षः सफर् फारूखी अयोध्याव्यवहारे आवेदकः इख्बाल् अन्सारी च तत्र भविष्यति। तस्मिन्नन्तरे कोविड् व्यापनस्य भूमिकायाम् एतादृशस्य समारोहस्य समायोजनं विरुध्य वामपक्षीयप्रभृतिभिः राजनैतिकदलैः विरोधः प्रकटितः।

नटवरम्ब:- नटवरम्ब सर्वकारीयोच्चविद्यालये संस्कृतवाराचरणस्य उद्घाटनं वेलूक्कर ग्रामपञ्चायत्त् अध्यक्षा श्रीमति उचिता सुरेष् निरवहत्। नटवरम्ब विद्यालयस्य शताब्दिनिमित्तं निर्मिते “SMART SANSKRIT ” इति वाट्साप् गणे कार्यक्रममिदं प्राचलत्। अस्मिन् वाट्साप् गणे शतदिनात्मकं निश्शुल्कसंस्कृतपठनं प्रचलन्नस्ति। रक्षाकर्तृसमितेः अध्यक्षः श्री अनिलः आध्यक्षपदम् अलङ्कृतवान्। कालटी सर्वकलाशालायाः व्याकरणविभागस्य प्राचार्यः डोः एम्. वि नटेशः मुख्यभाषणम् अकरोत्। हयर् सेक्कन्टरि विभागाध्यक्षः श्री नासरुद्दीन् अध्यापकप्रतिनिधिः श्री ताजुद्दीन् ,हयर् सेक्कन्डरिविभागस्य संस्कृताध्यापकः डोः महेष् बाबु प्रभृतयः आशंसाः समर्पयन्। हैस्कूल् प्रधानाध्यपिका श्रीमति लालिटीच्चर् स्वागतभाषणम् अकरोत्। हैस्कूल् विभागस्य संस्कृताध्यापकः श्री सुरेष् बाबु कृतज्ञतां व्याहरत्। सम्मेलनानन्तरं “कृतिः“इति संस्कृतसङ्गीतशिल्पं प्रादर्शयत् ।

 उत्तरप्रदेशे कोविड् रोगबाधया मन्त्रिणः मृत्युः,

केन्द्रीय गृहमन्त्री अमित्षा वर्यः कोविड् बाधितः अभवत्।

  नवदिल्ली-    उत्तरप्रदेशे मन्त्रिमण्डलसदस्या तान्त्रिकशिक्षाविभागमन्त्री च कमलराणी वरुण् वर्या कोविड् बाधया मृता। जूलै १८ दिनाङ्के तस्यां रोगबाधा स्थिरीकृता आसीत्। अतः लख्नौ चिकित्सालये चिकित्सायां वर्तमाना अद्य प्रातः दिवंगता अभवत्। अस्मिन्नन्तरे केन्द्रीयगृहमन्त्री अमित्षा वर्यः कोविड् बाधितः सन् चिकित्सालयं नीतः। आराष्ट्रं रोगिणां संख्या मृत्युसंख्या च अनुदिनं वर्धते।

केरलेषु अद्य ११६९ जनाः कोविड् बाधिताः सन्तीति आवेदयति। एषु ९९१ जनेषु सम्पर्केणैव रागबाधा सञ्जाता। शिष्टाः विदेशेभ्यः इतरराज्येभ्यश्च आगत्य सम्पर्कनिरोधे स्थिताः आसन्। एकस्य रोगिणः मरणमपि अद्य आवेदितम्।

तिरुवनन्तपुरम्- भारते संस्कृतानुरागिणां मुख्यदिवसो भवति श्रावणमासे पूर्णिमा तिथिः। पञ्चदशकं यावत् दिनमिदं संस्कृतदिवसत्वेन आचर्यते। 1969 तमे वर्षे एं. सी. चग्ला वर्यः यदा केन्द्रीय शिक्षामन्त्री आसीत् तदा एव संस्कृतदिवसमायोजयितुं निरणयो जातः। तदा प्रभृत्येव आकाशवाण्यां संस्कृतवार्ताप्रसारणमपि समारब्धम्।  र्अटल् बिहारी वाजपेयी वर्यः प्रधानमन्त्रीपदव्यां स्थित्वा 2000-2001 वर्षः संस्कृतवर्षत्वेन आचरितः। तदा प्रभृति प्रतिवर्षं संस्कृतवाराचरणमेव इदानीं संपत्स्यते। संस्कृतदिनस्य पूर्वं दिनत्रयं पश्चाच्च दिनत्रयं समायोज्य संस्कृतवारम् आचर्यते।

     संस्कृतं राष्ट्रीयैक्याय इति मुद्रावाक्यम् उद्घोषयन्नेव संस्कृतदिनमाचर्यते। अस्याः अमृतभाषायाः प्राधान्यं प्रसक्तिं च सामान्यजनेभ्यो अवबोधयितुं तथा संस्कृतपठनद्वारा पौराणिकम् आधुनिकं च विज्ञानं संयोजयितुमेव एतादृशं दिनाचरणम् कल्पितमस्ति। व्यवहारभाषात्वेन संस्कृतं प्रतिष्ठितुं यत्नं कृतवन्तः बहवः विद्वांसः सन्ति। तेषु प्रामुख्यं भजन्ते गुरुनाथः इति विख्यातः पुन्नश्शेरि नम्पि नीलकण्डशर्मा महाशयः तेषां मार्गं अनुसृत्य के.पी. नारायण पिषारोटिवर्यः, पी.टी. कुरियाकोस् वर्यः, वी. कृष्णशर्मा, प्रभृतयः विद्वांसः केरलेषु संस्कृतमहासागरे कर्णधाराः आसन्।

     संस्कृतभाषा तथा तस्यामन्तर्लीनां संस्कृतिं  विपुलां संपदं च मानवजीवनस्य विभिन्नां मेखलां स्पृशन्ति। वेदेषु वेदाङ्गेषु इतिहासपुराणादिषु दर्शनेषु उपनिषत्सु च सूचितानां विज्ञानानां प्रचारणम् आधुनिककले अवश्यंभावि। अतः संस्कृतदिनाचरणं केवलं आचरणाय न भवतु, संस्कृतप्रचारायैव भवतु।

केरलसर्वकारेण आयोजिता अङ्कीयशिक्षारीतिः आराष्ट्रं श्रद्धामावहद् इति मुख्यमन्त्री पिणरायि विजयन् वर्यः अब्रवीत्। भारते विदूरशिक्षा अभियानमधिकृत्य मानवसंसाधनमन्त्रालयस्य आवेदने आदर्शरूपेण केरलमेव अवातरत् इति तेन निगदितम्। एतत् केरलाय अभिमानास्पदम् इति कोविडवलोकनार्थमायोजिते वार्ताहरमेलने मुख्यमन्त्री अवदत्।
अङ्कीयकक्ष्या जालाधारितप्रवेशनम्, तान्त्रिकविद्याप्रयोगशालाप्रभृतिषु षोडश मानदण्डेषु पञ्चदश केरलेन आर्जितमिति आवेदने सूचितमस्ति। सार्वजनीनविद्यालयेषु जालाधारिककक्ष्या कार्य़क्षमतया प्रचलति, परं निजीयविद्यालयेषु समयक्रमः पुनरायोजनीयः इत्यपि मुख्यमन्त्रिणा सूचितम्।

दिल्ली- राष्ट्रे वर्तमानस्य विद्याभ्यासक्रमस्य आसमन्तात् परिवर्तनम् आयोजयति।  अधुना वर्तमानः उच्चविद्यालय-उच्चतरविद्यालयक्रमः परिवरितयिष्यति। तदर्थं शिक्षानायस्य प्रारूपं संसद् अङ्गीचकार। एतदनुसारं चतुर्षु सोपानेषु द्वादशाङ्कपरिपूर्तये अष्टादशवर्षीयः शिक्षासम्प्रदायः राष्ट्रे अयोजयिष्यते। इष्टतरं विषयं चित्वा पठितुमवसरः छात्राः लभन्ते। मानवविभवमन्त्रालयस्य नाम इतःपरं शिक्षामन्त्रालयः इति भविष्यति।  औद्योगिकी घोषणा अद्य सायं चतुर्वादने भविष्यति।

     राष्ट्रे शिक्षाक्षेत्रे समग्रं परिवर्तनम् अनेन जायते।  त्रीणिवयस्तः अष्टादशवयःपर्यन्तं शिक्षा अधिकारः भविता।  सममेव पाठ्यपद्धतेः बहिः कला-कायिकरङ्गेषु पाठ्येतरप्रवर्तनेष्वपि प्रामुख्यं दीयमाना रीतिरेव नयप्रारूपे विभाविता।

     दश-द्वादशकक्ष्यायोः परीक्षासम्प्रदायेपि परिवर्तनं निर्दिष्टम्। 10+2 इति अधुनातनां रीतिं परिवर्त्य  5+3+3+4  इति रूपेण शिक्षाधटनायाः परिष्करणायैव निर्णयः। पञ्चमकक्ष्यापर्यन्तं मातृभाषायामेव अध्ययनं भवेत्। प्रथमतः तृतीयकक्ष्यापर्यन्तं केवलं भाषा गणितं च पाठयितुं निर्देशः अस्ति।

Click here to read NEP