कोट्टयम्- कोविड् बाधया मृतस्य देहसंस्कारं कोट्टयं मुट्टम्बलं वैद्युतश्मशाने तद्देशवासिनः रुरोध। संस्कारवेलायां धूमशकलात् रोगव्यापनं भवेत् इति मृषाभीत्या नगरसभासदस्यस्य नेतृत्वे एव देशवासिनः संस्कारकर्व रुरोध। कोट्टयं चुङ्कं देशीयः औसेफ् जोर्ज् इत्याख्यस्य मृतदेह एव संस्कारार्थं तत्रानीत आसीत्। तस्य आराधनालये कोविड् मानदण्डानुसारं मृतदेहसंस्कारार्थं सुविधा नास्तीत्यतः नगरसभाश्मशानमानीतः। कोट्टयं विधानसभा सदस्य आगत्य देशवासिभिः सागं संभाषणं कृत्वा अपि जनैः न अनुमितः।

     रात्रौ आरक्षिदलस्य सान्निध्ये नगरसभा अधिकृतानाम् अनुमत्या मृतदेहः तस्मिन्नेव श्मशाने संस्कृतः। मृतदेहं प्रति तद्नांदेशायानां केषांचन जनानां शत्रुता विषये आकेरलं जनाः जागरिताः अभवन्। मृतशरीरं कदापि अस्माकं शत्रुः, रोगी अपि अस्माकं शत्रुः नास्ति। रोग एव शत्रुः, रोग एव निष्कासितव्यः इत्याह्वानेन समाजमाध्यमेषु केरलीयाः प्रचारणाय अद्यताः सन्ति।

नवदिल्ली- भारतस्य कार्गिल् युद्धविजयस्य अद्य 21 वयः। ओपरेशन् विजय् इति नामना स्थलसेनया तथा ओपरेशन् सफेद् सागर्  इति नाम्ना व्योमसेनया च संयुक्ततया कृते संग्रामे पाकिस्तानं विरुध्य भारतं विजयमवाप।

     युद्धे वीरमृत्युं प्राप्तानां 527 धीरसैनिकानां कृते श्तल-नाविक-व्योमसेनाविभागस्थाः अधिकारिणः दिल्ल्यां युद्धस्मारके पुष्पचक्रम्  समर्पयिष्यति।

     1999मेय-जूलै काले जम्मू काश्मीरे कार्गिल् प्रदेशे एव युद्धं समारब्धम्। पाक् सैन्यस्य सहयोगेन भीकराः सीमामतिक्रम्य अक्रमणमारभन्त। तदा एव भारतेन प्रत्यादेशो दत्तः

     18000 पादमिते ऊर्ध्वभागे शत्रुसैन्यैः प्रतिकूलसाहचर्यैश्च कृते आहवे एव ऐतिहासिकं विजयमवाप भारतम्। स्वर्गीयः अटल् बिहारी वाजपेयी वर्यः आसीत् तदानीन्तनः प्रधानमन्त्री।

भोपाल्- मध्यप्रदेशमुख्यमन्त्री तथा वरिष्ठः भा.ज.पा. नेता च शिवराज् सिंह् चौहान् वर्यः कोविड्-१९ रोगबाधितः अभवत्। कार्यमिदं स एव स्वकीये ट्विट्टर् द्वारा प्राकाशयन्।”

मम प्रियाः देशवासिनः मयि कोविड्-१९ रोगस्य लक्षणमासीत्। प्रथमे परीक्षणे मयि रोगबाधा स्थिरीकृता।”
इत्येव स ट्विट्टर् मध्ये सूचितवान्।

मुख्यमन्त्रिणा सह सम्पर्कं सञ्जातान् सर्वान् सम्पर्कनिरोधे प्रावासयत्।

मङ्गलूरु- कोविड् व्यापनं समाजे बृहत्तरं प्रतिसन्धिमसृजत्। एतादृशः प्रतिसन्धिरेव समाजे नायकान् सृजति। तादृशः एकोस्ति मंगलूरुस्थः मुहम्मद् आरिफ् इति रुग्णवाहिकाचालकः। कोविड् बाधया मृतस्य कस्यचन वृद्धस्य मृतदेहसंस्कारार्थम् उद्यम एव आरिफ् वर्यं प्रशस्तं चकार।
अपत्यैः उपेक्षितः वृद्धसदने कालं नीतः वेणुगोपाल रावु इति ६२ वयस्कः कोविड् बाधया मृतः। परं तस्य मृतदेहं स्वीकर्तुं बान्धवाः नागताः। कोविड् संक्रमणभीत्या प्रेतसंस्कारार्थम् अन्यः कोपि नागतः। अस्मिन्नन्तरे आरिफ् सन्नद्धतां प्रकटय्य आगतवान्।
अनाथरूपेण मृतदेहे स्थिते आरक्षिनिलये सूचनां दत्वा आरिफ् वर्यः प्रेतसंस्कारार्थमागतः।

तिरुवनन्तपुरम्- केरलराज्ये कोविड् प्रतिरोधप्रवर्तनानि  चर्चितुं मुख्यमन्त्री पिणरायि विजयन् वर्यः सर्वदलानाम् अधिवेशनं समाहूतवान्। जूलै 24 दिनाङ्के सायं त्रिवादने वीडियो समारोहरूपेणैव अधिवेशनं सम्पत्स्यते।

     विधानसभायाः निर्णीतसमारोहस्य परिवर्तनादीन् विषयान् सर्वदलाधिवेशने चर्चाविषयो भविता। धनविनियोगदेयकस्य समर्थनार्थमेव जूलै 27 दिनाङ्के विधानसभायाः आधिवेशनं निश्चितमासीत्। परन्तु कोविड् व्यापने रूषिते अधिवेशनं परिवर्तनीयं भवति।

     अस्मिन्नन्तरे राज्य कोविडामयेन चत्वारः जना अद्य मृताः। इदंप्रथमतया एव एकस्मिन् दिने चत्वारि मरणानि आवेदयति। अनेन कोविड् बाधया राज्ये मृतानां संख्या 48 जाताः।

नवदिल्ली- अखिलभारतीय वैद्यकसंस्थानस्य-एयिंस्- कोविड् प्रतिरोधकपरीक्षणं प्रथमसोपाने ३७५ जनेषु विधास्यति इति निदेशकः रण्दीप् गुलेरिया असूचयत्।

प्रतिरोधकपरीक्षणाय १८०० जनाः एयिंस् जालपुटे पञ्जीकृतवन्तः। एषु ११२५ जनेषु परीक्षणं विधास्यति। प्रथमसोपाने ३७५ जनेषु परीक्षणेन प्रतिरोधकस्य सुरक्षितत्वं मात्रा च ज्ञातुं शक्यते।

द्वितीयसोपाने १२ तः ६५पर्यन्तं वयःपरिमितेषु ७०० जनेषु परीक्षणं भविता। तृतीयसोपाने अधिकाधिकेषु जनेषु परीक्षणं व्यापयिष्यति। तृतीयसोपानस्यन्ते परीक्षिताः विषाणुं प्रति यावत् प्रतिरोधकम् आर्जितवन्तः इत्यवगम्यते इत्यपि एयिंस् निदेशकः अवदत्।

तिरुवनन्तपुरम्- कोविड् रोगव्यापने वर्धमाने तटप्रदेशेषु पूर्णपिधानं विधास्यतीति मुख्यमन्त्री अवदत्। आगामिनि दिने एतदर्थम् आदेशः दीयते इति अवलोकनयोगानन्तरं मुख्यमन्त्री वार्ताहरान् व्यजिज्ञपत्।

प्रतिरोधप्रवर्तनानि सफलानि कर्तुं तटप्रदेशः मेखलात्रयरूपेण पर्यकल्पयत्। अञ्चुतेङ् आरभ्य पेरुमातुरा पर्यन्तं प्रथममेखला, पेरुमातुरा तः विषिञ्ञं पर्यन्तं द्वितीयमेखला, विषिञ्ञं आरभ्य ऊरम्प् पर्यन्तं तृतीयमेखला च। अत्र स्थितिगतीः नियन्त्रयितुं आरक्षिदलं नियुक्तमित्यपि मुख्यमन्त्री अवदत्।

प्रति मेखलं द्वौ भारतीयप्राशासनिकसेवा राजपुरुषौ दायित्वं स्वीकरिष्यतः। तटप्रदेशे यात्रार्थं निरोधः आयोजितः। अवश्यकार्यायैव यात्रोद्यमः भवेयुरिति मुख्यमन्त्री अवदत्।

तिरुवनन्तपुरम्- केरलराज्ये प्लस्-टु (उच्चतरविद्यालयः) वि.एच्.एस्.इ.(वृत्तिविषयक उच्चतरविद्यालयः) परीक्षापरिणामः अद्य धोषयिष्यति। अद्य मध्याह्नादूर्ध्वं द्विवादने शिक्षामन्त्री प्रो. सी. रवीन्द्रनाथवर्यः परीक्षाफलं धोषयिष्यति।www.keralaresult.nic.in इति जालपुटे परीक्षाफलं लप्स्यते। डि.एच्.एस्.इ.  पि.आर्.डि. कैट्  जालपुटेष्वपि फलं लभेत। पि.आर्.डि, लैव, सफलं 2020 मोवैल् आप् द्वारा अपि परीक्षापरिणामं ज्ञातुं शक्यते। सि.बि. एस्.इ दशमकक्ष्यापरीक्षाफलमपि अद्य घोषयिष्यति।

नवदिल्ली- श्रीपद्मनाभमन्दिरे तिरुवितांकूर् राजपरिवारस्य अधिकारः सर्वोच्चन्यायालयेन व्यवस्थापितः। मन्दिरं सर्वकारेण स्वायत्तीकरणीयम् इति केरलीय-उच्चन्यायालयस्य निर्णयं विरुध्य राजपरिवारेण समर्पिते आवेदने एव अधुना सर्वोच्चन्यायालयस्य निर्णायकः विधिनिर्णयः।

     पद्मनाभस्वामिमन्दिरस्य प्रशासनाय नूतना समितिः आयोजनीया इति न्यायालयेन आदेशो दत्तः। तावत्पर्यन्तं मण्डलन्यायाधिपस्य आध्यक्ष्ये अधुना स्थितायाः समितेः मन्दिरप्रशासनम् अनुवर्तयितुम् अधिकारः अस्ति। न्यायाधिशः यु.यु. ललित् वर्यस्य आध्यक्ष्ये आयोजितस्य संवेशनस्यैव एष निर्णयः।

     पद्मनाभस्वामिमन्दिरं राज्ञः परम्परायै दातुं व्यवस्था नास्तीति सूचयन्नेव 2011 संवत्सरे मन्दिरं सर्वकारेण स्वायत्तीकरणीयमिति उच्चन्यायालयेन आदेशो दत्तः आसीत्। एनं निर्णयं विरुध्यैव राजपरिवारः सर्वोच्चन्यायालये व्यहारं नीतवन्तः।