वेल्लिङ्‍टण्- न्यूसिलान्ट् सर्वकारे प्रथमतया भारतवंशीया मन्त्री। सा तु केरलीया प्रियङ्का राधाकृष्णन् इत्याख्या। लेबर् पार्टी इति दलस्य सदस्या भवति प्रियङंका। सा सामाजिकविकासः, युवजनक्षेमः सन्नद्धता इत्यादिषु विभागेषु कार्यं करिष्यति। वृत्तिविभागे सहमन्त्रिपदवीमपि सा एव निर्वक्ष्यति।

गते मन्त्रिमण्डले मन्त्रिपदव्यां स्थितायाः जेन्नी सेयिल्सायाः वैयक्तिककार्यदर्शीपदव्यामासीत् प्रियङ्का। लेबर् पार्टी सर्वकारस्य द्वितीये सत्रे उपप्रवक्तृपदवीमपि सा जग्राह।

कोरलेषु एरणाकुलं परवूर् देशीया भवति प्रियङ्का। १४ वर्षाणि यावत् लेबर् पार्टी दलस्य प्रवर्तिका अस्ति।

तिरुवनन्तपुरम्- साहित्यरंगे केरलीयसर्वकारेण दीयमाना परमोन्नतबहुमतिः भवति एषुत्तच्छन् पुरस्कारः। मलयालभाषापितुः तुञ्चत्त् एषुत्तच्छन् वर्यस्य नाम्नि संस्थापितः अयं पुरस्कारः अस्मिन् वर्षे विख्यातकथाकाराय सक्करियावर्याय दीयते। साहित्यरंगे समग्रयोगदानमभिलक्ष्यैवायं पुरस्कारः। पञ्चलक्षं रूप्यकाणि फलकं च पुरस्कारे अन्तर्भवति। सांस्कृतिकविभागमन्त्री ए.के.बालन् वर्यः पुरस्कारमघोषयत्।

     केरल्यां श्रद्धेयः लेखकः भवति सक्करिया। तेन लिखिताः सर्वाः अपि कथाः श्रेष्ठाः सन्ति। केन्द्र साहित्य अक्कादमी पुरस्कारः, केरल साहित्य अक्कादमी पुरस्कारः, ओ.वी. विजयन् पुरस्कारः, केरल साहित्य अक्कादम्यां विशिष्टाङ्गत्वम् इत्यादयः निरवधिकाः अङ्गीकाराः सक्करियावर्यं प्रापन्।

     1945 जूण् 5 दिनाङ्के कोट्टयं मीनच्चिल् तालूक् पैका मध्ये अयं भूजातः। कुञ्ञच्चन् त्रेस्यक्कुट्टी च पितरौ। बंगलूरु एं इ.एस् कलाशालायां तथा काञ्ञिरप्पल्ली डोमनिक् कलाशालायां च अयम् अध्यापकः आसीत्।

    नवम्बर् प्रथमं दिनं ऐक्यकेरलसंस्थापनदिवसं भवति। अस्मिन्नेव दिने कैरलीसाहित्यस्य परमोन्नतः अयं पुरस्कारः घोषितः।

नवदिल्ली- फ्रान्स् राष्ट्रे नोत्रदां बसेलिक्का इति क्रैस्तवाराधनालये त्रयाणां मृत्योः कारणभूतं भीकराक्रमणं भारतेन अपलपितम्। भीकरवादं विरुद्ध्य क्रियमाणे आहवे भारतं फ्रान्स् राष्ट्रेण साकं तिष्ठतीति प्रधानमन्त्री नरेन्द्रमोदी वर्यः ट्वीट्टर् मध्ये सूचितवान्। बहुभिः विश्वराष्ट्रैः एषा दुर्घटना अपलपिता। आक्रमणे मृतानां परिवारेभ्यः प्रानस् पौरेभ्यश्च प्रधानमन्त्री अनुशोचनं व्याजहार। कस्मिन्नपि साहचर्ये भीकरवादस्य आतङ्कवादस्य च न्यायीकरणं कर्तुं न शक्यते इति भारतीय विदेशकार्यमन्त्रालयस्यापि सूचना अस्ति।

     पूर्वं फ्रान्सिस् मार्पापा वर्यः घटनामेनाम् अपलपति स्म। सर्वविधानि भीकरप्रवर्तनानि अवसादयितुं मार्पापा जनान् उदबोधयत्। मारितेभ्यः प्रार्थनां विधास्यतीत्यपि मार्पापा व्याजहार। ब्रिट्टीष् प्रधानमन्त्री बोरिस् जोण्सण् वर्यः अपि भाकरविरुद्धतायैः स्वसज्जतां प्रकटीचकार। तुर्की, इरान् प्रभृतीनि राष्ट्राण्यपि घटनामेनाम् अपालपन्।

   फ्रान्स् राष्ट्रे नीस् आख्ये तीरदेशनगरे  एव नोत्रदां वसेलिका अवतिष्ठते। ह्यस्तने एव तत्र भीकराक्रमणं सञ्जातम्। बसेलिकायाः अन्तः प्रविश्यैव भीकराः आक्रमणमारभन्त। मृतेषु द्वे स्त्रियौ स्तः। धर्मनिन्दामारोप्य फ्रान्स् देशे पारीसे कंचन श्क्षकं शिरच्छेदेन हन्ति स्म।

नवदिल्ली-  फेस्बुक्क् इत्याख्यस्य मुखपुस्तकस्य भारत-दक्षिणेष्या मध्येष्या प्रान्तस्य नयनिदेशिका अङ्की दास् वर्या स्वकीयस्थानात् त्यागपत्रम् अदात्। फेस् बुक्क् मध्ये विद्वेषप्रचारणनियन्त्रणमनुबन्ध्य सञ्जाते विवादे भा.ज.पा. दलाय स्वपक्षं समर्थितवती सा इति विषये  विवादवनिता आसीत् सा। परन्तु स्थानत्यागस्य कारणम् अविदितमेव।

     फेस् बुक्क मध्ये राजनैतिकविषयनियन्त्रणविषये अङ्की दास् वर्यायाः दायित्वं संघस्य अन्तर्भागात् सर्वकारीयतलाच्च विमर्शितमासीत्। भा.ज.पा दलीयानां विद्वेषप्रचारणं विरुध्य कार्यान्वयनस्वीकारम् अङ्किता द्सेन स्थगिता  इति वाल्स्ट्रीट् मासिक्याः आवेदनमेव विवादास्पदमभूत्।

     गते सप्ताहे अङ्की दास् वर्या  संसदीयसमितेः पुरतः उपस्थिता आसीत्। फेस्बुक्क् मध्ये  वैयक्तिकतामनुबन्ध्य आशङ्का परिहारार्थमेव सा समितेः पुरतः उपस्थिता। तत्र होराद्वयं यावत् सा प्रश्नान् प्रत्युक्तवती आसीत्।

इस्लामाबाद्-  मृत्युदण्डं  परिकल्प्य पाकिस्ताने कारागारवासम् अनुवर्तमानस्य कुलभूषण् यादवस्य दण्डनं पुनः परिशोधयितुं आयोजितं विधेयकं पाक् संसदः परिषदा अनुमितम्। इन्टर्नाषणल् कोर्ट् आफ् जस्टीस्(रिव्यू आन्ट् रीकण्सिडरेषन्) ओर्डिनन्स् इति नामाङ्कितस्य विधेयकस्य राष्ट्रिय  विधानसभायां नीतिन्याय स्थिरसमित्यां चर्चानन्तरमेव अङ्गीकारो लब्धः।

     अन्ताराष्ट्र नीतीन्यायालयस्य निर्देशान् पलयति विधेयकमिदम् इति चर्चायां भागं वहन् नीतिन्याय विभागमन्त्री फारुख् नसीम् अवदत्। भीकरवादं चारवृत्तिं च समारोप्य 2017 एप्रिल् मासे एव सेवाविरतं नौसेनाकर्मकरं कुल्भूषम् यादवं पाकिस्तान सैनिकन्यायालयः मृत्युदण्डम्  व्यदधात्।

जय्पूर्- अखिलभारतीय-वैद्यकप्रवेशकपरीक्षायां आहत्य 720 अङ्केषु 720 अङ्कान् पूर्णतया  अवाप्य अखिलभारतस्तरे प्रथमस्थानमाप्तवान् ओडीषा रूर्कलादेशायः षोय्ब् अफ्ताब् इति अष्टादशवयस्कः युवा। वैद्यकीयाध्ययनं समाप्य हृद्रोगचिकित्सको भवितुं स इच्छति।

     राज्यस्थानराज्ये कोट्टा मण्डले करियर् इन्स्टिट्यूट् इति संस्थाने एव ऊर्जिताध्ययनाय गतवानयम्। आराष्ट्रं पिधाने घोषिते सर्वेपि तस्य सब्रह्मचारिणः स्व स्वदेशं प्रतिनिवृत्ताः। तथापि षोय्ब् तत्रैव उषित्वा अधिकसमयम् अध्ययनाय व्ययितवान्। अस्य कठिनप्रयत्नस्य फलमेव अनेन प्राप्ताः पूर्णाङ्काः।

     प्रतिसन्धीनां मध्ये अतीव क्लेशमनुभूयैव अस्मिन् वर्षे नीट्ट् परीक्षा आयोजिता इति शिक्षामन्त्री रमेश् पोख्रियाल् वर्यः अवदत्। कोविड् मानदण्डान् परिपाल्य परीक्षा समुन्नतरीत्या प्रचालिता।तदर्थं सहकृतेभ्यः मुख्यमन्त्रिभ्यः मन्त्री कृतज्ञताम् अवदत्। 1367322 छात्राः परीक्षामलिखन्। एषु 290 छात्राः ओक्टोबर् 14 दिनाङ्के एव परीक्षां लिखितवन्तः।

तृशूर् – ज्ञानपीठविजेता वरिष्ठः कैरलीमहाकविश्च पद्मश्री  अक्कित्तम् अच्युतन् नम्पूतिरिवर्यः निर्यातः। स 94 वयस्कः आसीत्। तृशूर् नगरे निजीय चिकित्सालये अद्यः प्रातः 8.10 वादने आसीत् अन्त्यम्। वार्धक्यसहजेन आमयेन चिकित्सायामासीत्। द्विदिवसात् पूर्वं  गुरुतरेण अस्वास्थ्येन स चिकित्सालयं नीतः आसीत्।

     अस्मिन् वर्षे भारतसर्वकारेणः जञानपीठपुरस्कारं दत्वा स समादृतः । आमयपीडितत्वात्@ गते सेप्तम्बर् 24 दिनाङ्के ज्ञानपीठपुरस्कारः  तस्य गृहे आयोजिते अधिवेशने एव दत्तः।

2008 तमे वर्षे केरलसर्वकारस्य एषुत्तच्छन् पुरस्कारः, 2012 तमे वर्षे वयलार् पुरस्कारः, ततः पद्मश्रीपुरस्कारश्च अनेन पाप्ताः। तस्य इरुपतां नूट्टाण्टिन्टे इतिहासं इति कैरलीकविता मलयालभाषायाः आधुनिकतायै निदानरूपेण परिगण्यते। 1956तः 1985 पर्यन्तं स महाकविः आकाशवाण्यां सम्पादकरूपेण कर्म कृतवान्।, कविताः, नाटकानि, कथाश्च आहत्य षट्चत्वारिंशत् साहित्यरचना अनेन कृता।

     1926 तमे वर्षे मार्च् मासस्य 18 दिनाङ्के पालक्काट् मण्डले कुमारनल्लूर् देशे अमेट्टूर् अक्कित्तत्त् मनायां अयं महाकविः भूदातः अभवत्।   अस्य मृत्युना कैरलीकवितायाः इतिहास एव अनतरधात् इति प्रमुखाः वदन्ति।

तिरुवनन्तपुरम्- 2019 वर्षस्य केरलीयचलनचित्रपुरस्काराः घोषिताः। सांस्कृतिकविभागमन्त्री ए.के. बालन् वर्यः पुरस्कारान् अघोषयत्। मधु अम्बाट्ट् वर्यस्य आध्यक्ष्ये आयोजिता पुरस्कारनिर्णयसमितिरेव विजयिनः अचिनोत्। पुरस्कारार्थं 119 चलनचित्राणि निरीक्षितानि। ओषु पञ्च बालकानां चलनचित्राणि आसन्। प्रतियोगितार्थम् आगतेषु 50 प्रतिषतं चलनचित्राणि नवागतनिदेशकानाम् इत्येतत् अस्मिन् रंगे शुभप्रतीक्षां ददाति इति मन्त्री अवदत्।

पुरस्काराः एवम्-

उत्कृष्टं चलनचित्रम् – वासन्ती। द्वितीयम् उत्कृष्टं चित्रम् – केञ्चिरा।

उत्कृष्टः नटः – सुराज् वेञ्ञारमूट् – चित्रं विकृतिः, आन्ड्रोय्ट् कुञ्ञप्पन्। नटी – कनि कुसृतिः, चित्रं बिरियाणी।

उत्कृष्टः निदेशकः – लिजो जोस् पेल्लिश्शेरि, – चित्रं जेल्लिक्केट्ट्।

संगीतनिदेशकः – शुषिन् श्याम्।, सम्पादकः – किरण् दास्।, गायकः – नजीम् अर्षाद्, गायिका – मधुश्री नारायणन्।

चलनचित्रग्रन्थस्य कृते पुरस्काराय डो. पी.के. राजशेखरः अर्हो अभवत्।

सिड्नी-  नवीनकोरोणावैराणुः धनपत्र-स्फटिक-चलद्दूरवाणी प्रभृतीनां प्रतलेषु दिनानि यावत् स्थास्यतीति अन्ववेक्षणम्। ओस्ट्रेलिया राष्ट्रस्थे प्रशस्ते जैवसंरक्षणपरीक्षणालये एव एतादृशं परीक्षणं समायोजयत्।

     धनपत्रे स्फटिके च 2-3 दिनानि यावत् विषाणुः स्थास्यति इत्यासीत् पूर्वनिर्णयः। परन्तु टलद्दूरवाणी, स्फटिकं, काचनिर्मितपात्रं धनपत्रम् इत्यादिषु  28 दिनानि यावत् स्थातुं विषाणुः प्रभवति इति अधुनातनं पर्यवेक्षणं सूचयति।

     20 डिग्रि सेल्ष्यस् तापमाने कोरोणा विषाणुः 28 दिनानि यावत् स्थास्यतीति आवेदने वदति। विषाणुपठनवार्तापत्रिकायामेव सी.एस्.ऐ.आर्. संघस्य गवेषणावेदनं प्रकाशितम्।

     कार्पाससदृशवस्तुषु उपरितले अनुकूलावस्था चेत् 14 दिनानि यावत् विषाणुः स्थास्यति। वर्धिते तापमाने एतत् 16 होरारूपेण न्यूनतां प्राप्नोति। मांससंस्करणस्थलेषु शीतीकृतावस्थासु च कोविड् रोगव्यापनस्य साध्यता अधिका इति च आवेदने सुचयति।

केरलराज्यं सम्पूर्णाङ्कीयराज्यत्वेन परिवर्तनस्य आधिकारिकं घोषणम् ओक्टोबर् १२ दिनाङ्के मुख्यमन्त्री पिणरायि विजयन् वर्यः आधिजालिकतया निर्वक्ष्यति। सार्वजनीन शिक्षाविभागमन्त्री प्रोफ. सी रवीन्द्रनाथवर्यः अध्यक्षो भविता।

अनेन सह प्रतिमण्डलं चिते विद्यालये विधानसभासामाजिकस्य नेतृत्वे विधानसभामण्डलस्य अङ्कीयपरिवर्तनप्रख्यापनमपि विधास्यति। राज्यस्थम् अखिलानामपि विद्यालयानाम् अङ्कीयपरिवर्तनघोषणं विद्यालयतले भविष्यति।

राज्ये मुख्यमन्त्रीतः पञ्चायत् अङ्गं यावत् सर्वेषां प्रतिनिधीनां संवेशनम् इति विशेषमपि अस्यास्ति। कार्यक्रममवलोकयितुं राज्ये सर्वे जनाः प्रभवन्ति। विक्टेस् नालिकाद्वारा एतदर्थं सुविधा आयोजिता।