Daily Archives: July 24, 2018
चिन्ता रवीन्द्रन् स्मारकः पुरस्कारः सुनिल् पी. इलयिटं वर्याय।
तृशूर्- प्रथमः चिन्ता रवीन्द्रन् स्मारकः पुरस्कारः सुनिल् पी.इलयिटं वर्याय समर्पयति। लेखनद्वारा प्रभाषणद्वारा च केरलानां सर्गात्मक-बौद्धिकमण्डलेषु प्रवर्तमानं प्रगत्यात्मकं हस्तक्षेपं परिगणय्यैव पुरस्काराय एनं वर्यं पर्यगणयदिति चिन्तारवीन्द्रन् प्रतिष्ठानस्य अध्यक्षः शशिकुमारः अवदत्।
५०००० रूप्यकाणि प्रशस्तिपत्रं फलकं च पुरस्कारे अन्तर्भवन्ति। आगस्त् ४ दिनाङ्के तृशूर् नगरे समपद्यमाने अधिवेशने जवहर्लाल् नेह्रू विश्वविद्यालयस्य प्राध्यापिका डो. निवेदिता मेनोन् वर्या पुरस्कारं तस्मै प्रदास्यति।
केरलराज्ये विद्यालयेषु दूरदर्शनयन्त्राणि सम्भृतप्रणाली छायाग्राहिकां च स्थापयिष्यति।
मलप्पुरम्- राज्यस्थेषु सर्वकारीय-निजीयविद्यालयेषु ४०८३ कक्ष्याप्रकोष्ठान् अतितान्त्रिकरूपेण परिवर्तनमकरोत्। ततः पश्चात् सम्पूर्णेषु सर्वकारीय-निजीयविद्यालयेषु सम्भृतप्रणालीछायाग्राहिकां तथा दूरदर्शनयन्त्राणि च स्थापयिष्यति। एतदर्थं कैट्(KITE) इति संस्थानं धुरामावहति। कैट् संस्थानस्य जनपदस्थानीयाः संयोजकाः विद्यालयानां पश्चात्तलसौविध्यमधिकृत्य सर्वकारम् आवेदयिष्यन्ति। एतदतिरिच्य अतितान्त्रिकरूपेण परिवर्तनं कर्तुमशक्तरूपाणा कक्ष्याप्रकोष्ठानां कृते अतितान्त्रिकोपकरणानि एककरूपेण दास्यति। कैट् संस्थानस्य आवेदनानुसारमेव एष निर्णयः अभवत्।
