नवदिल्ली- मुख्यपुरोहितः फ्राङ्को मुलक्कल् जलन्धर् मुख्यपुरोहितपदवीं जहाति स्म। एतत् कार्यं सूचयन् मुख्यपुरोहितः स्वसमुच्चयस्थान् वैदिकान् प्रति पत्रं प्रेषितवान्। अधुना समुच्चयस्य भरणपरं दायित्वं मात्यु कोक्कण्टस्य नेतृत्वे त्रयाणां वैदिकानामस्ति।

भरणपरं दायित्वमेव केवलं स अजहात्। मुख्यपुरोहितरूपेण आध्यात्मिकपदवी तस्निन्नेव निक्षिप्तास्ति। स्थानत्यागस्य आवश्यकतां वत्तिक्कान् नगरात् निरदिशदिति सूचना।

गतदिने सी.बी.सी.ऐ. अध्यक्षः तथा मुम्बै आर्च बिषप् च कर्दिनाल् ओस्वाल् ग्रेष्यस् वर्यस्य कार्यालयात् लब्धां सूचनामनुसृत्य वत्तिक्कान् नगरात् निर्देशो आगतः इति स्थिरीकरोति। गतेषु दिवसेषु वत्तिक्कान् नगरे आसीत् कर्दिनालि ओस्वाल् ग्रेष्यस् वर्यः स ह्यस्तने मुम्बैनगरं सम्प्राप्तवान्।

कण्णूर्- उपजिल्लातल-तरणप्रतियोगितामध्ये नवमकक्ष्याछात्रस्य जले उपमज्यमरणम् उपलक्ष्य तलश्शेरि उपजिल्ला विद्याभ्यास अधिकारी, अध्यापकाश्चाहत्य नवजनाः निगृहीताः। तलश्शेरी जगन्नाथमन्दिरस्य वाप्याम् उपमज्य न्यूमाही एं.एं. उच्चतरविद्यालयस्थस्य हृत्विक् राज् इति छात्रस्य मृत्युमुपलक्ष्यैव एते निगृहीताः।

तलश्शेरि ए.इ.ओ. सनकन्, प्रतियोगितासमित्यामन्तर्भूताः अब्दुल् नसीरि, मुहम्मद् सक्करिया, मनोहरन्, करुणन्, वी.जे.जयमोल्, पी.षीन, सोफिन् जोण्, सुधाकरन् पिल्ला प्रभृतयः एव रक्षिसंघेन निगृहीताः। भारतीयदण्डनियम ३०४ ए अनुसारं नरहत्याविषये व्यवहारः पञ्चीकृतः।

तृशूर्- वल्लत्तोल् साहित्यसमितेः ऐषमः वल्लत्तोल् पुरस्कारं प्रसिद्धसाहित्यकाराय एं मुकुन्दन् वर्याय दास्यति। मलयालसाहित्याय दत्तं समग्रयोगदानम् अभिलक्ष्यैव पुरस्कारः कल्पितः।११११११ रूप्यकाणि कीर्तिफलकञ्च पुरस्कारे अन्तर्भवन्ति। ओक्टोबर् १६ दिनाङ्के अनन्तपुर्यां तीर्थपादमण्डपे आयोज्यमाने समारोहे पुरस्कारं प्रदास्यति।

नवदिल्ली- रूप्यकस्य मूल्यं पुनरपि ऐतिहासिकायां न्यूनतायां पतति। बुधवासरे प्रातः डोलरं प्रति ७२.९२ पदव्याम् आगतम् रूप्यकाणां विनिमयमूल्यम्। विदेश-निक्षेपकाः राष्ट्रस्थविपणीतः परावर्तन्ते इत्येतदेव मूल्यशोषणस्य प्रधानं कारणम्। कुजवासरे १४५४ कोटि रूप्यकाणाम् अंशकान् ते विक्रीतवन्तः। विकस्वरविपणीतः  मुद्रापत्राणि विक्रीय अतिसुरक्षितं डोलरं प्रति निक्षेपं परिवर्तयन्ति निक्षेपकाः। एतदपि रूप्यकस्य मूल्यशोषणे कारणमस्ति।

कोच्ची- कन्यास्त्रीपीडनविषये जलन्धर् मुख्यपुरोहितस्य निग्रहः विलम्बते इति कारणेन समरं कृतवतीनां कन्यास्त्रीणाम् आलम्बनमुद्घोषयन्त्यः वह्यः कन्यास्त्रियः प्रमुखाः नेतारश्च रङ्गमागताः। संयुक्तक्रैस्तवसमितेः नेतृत्वे उच्चन्यायालयपरिसरे सम्पद्यमानः समरः दिनचतुष्टयमतीताः

अस्मिन्नन्तरे कन्यास्त्रियः परिवारः उच्चन्यायालये आवेदनं कर्तुं स्वीकृतः निर्णयः जहाति स्म। सर्वकारात् सभायाः वा नीतिमलभमानाः एव एताः प्रत्यक्षप्रतिषेधेन रङ्गमागताः। रक्षिपुरुषाः व्यवहारं विपरिणमयितुं यतन्ते इति परिवारस्याक्षेपः।

कन्यास्त्रीणां समरमनुबन्ध्य रक्षिदलं सर्वकारश्च किमकुरुताम् इति बोधनार्थं उच्चन्यायालयेन निर्दिष्टम्। अस्मिन् विषये स्वीकृतः उद्यमः सूचनीयः इत्यपि न्यायालयेन निर्दिष्टम्। गुरुवासरे व्यवहारं पुनरालोच्यते।

तिरुवनन्तपुरम्- विद्यालयीयकलोत्सवं हातुं सर्वकारस्य निर्णये प्रतिषेधेन सह छात्रसंघाः रङ्गमागताः। एस्. एफ्.ऐ., के.एस्.यू. प्रभृतयः संघा एव प्रतिषेधमसूचयन्।

कलोत्सवः छात्राणामधिकार एव कलोत्सवसञ्चालनार्थं सर्वकारं निवेदयति इति एस्.एफ्.ऐ. संघः अवदत्। प्रलयदुरन्तस्य भूमिकायां कलोत्सवं संघाटयन् छात्राणां आत्मशक्तिः संवर्धनीया इति के.एस्.यु. संघश्चावदत्।

प्रलयदुरितमभिलक्ष्य सर्वान् आघोषान् विहातुं सर्वकारेण निर्णीतमासीत्। तेषु मध्ये विद्यालयीय कलोत्सवः अपि अन्तर्गतः। छात्राणां कृते कृपाङ्कादिकेषु विषयेषु विघातः सम्भवेयुः इति आशङ्कया छात्रसंघाः प्रतिषेधेनागताः।

अप्रकीक्षितं तथा विवरणातीतं च प्रकृतिदुरन्तम् अतिजीव्य वयं केरलीयाः पुनरुज्जीवनपथे अस्ति। प्रलये संलग्नान् जनान् रक्षितुं देशः देशस्थाः प्रशासनं च एकीभूय प्रवर्तनं कृतम्। अनेन बहून् जीवान् रक्षितुं वयं प्राभवामः।

प्रलयेन गृहं त्यक्त्वा आश्वासकेन्द्रं शरणं प्राप्तेभ्य जनेभ्यः तादृशकेन्द्राणि स्वभवनानीव सुविधान् अयच्छन्। अपघातसमये केरलीयसमाजस्य ऐक्यं, विश्वमलयाळिसमाजस्य अनुदानं, मानवप्रेमिणाम् ऐक्यदार्ढ्यम् एतत् सर्वं अतिजीवनपथे नूतनमध्यायमभवत्।
प्रलयबाधितेभ्यः साहाय्यार्थं तथा तेषां जीवनपुनारचनायै च मुख्यमन्त्रिणः दुरिताश्वासनिधिं प्रति साहाय्ये अभ्यर्थिते सर्वाभ्यः दिग्भ्यः साहाय्यप्रवाहमेवापश्यत्। परन्तु अस्माकं नष्टं बृहत्तरं भवति। नवकेरलसृष्ट्यर्थं बहुधनमपेक्षितम्। भग्नाः विद्यालयाः सार्वजनीनकार्यालयाः रथ्याः सेतवः गेहाः इत्यादीन् पुनर्निर्मातुं महद्धनमावश्यकम्। वयं ऐकमत्येन तिष्ठामश्चेत् धनसमाहरणम् अनायासं भवेत्।
पुनर्ऩिर्माणाय धनसमाहरणार्थं संघटितः प्रयत्नः सर्वकारेण क्रियते। अस्मिन्नवसरे केरलस्थान् सर्वानपि छात्रान् अस्मिन् कर्मणि भाहभाजिनः भविष्यन्तीति सर्वकारः प्रतीक्षते। छात्राणाम् अनुदानं विद्यालयीयस्तरे सेप्तम्बर् ११ दिनाङ्के सञ्चेतव्यमिति उद्दिश्यते। राज्यस्थेभ्य सर्वेभ्यः विद्यालय़ेभ्यः एवं सञ्चिन्वमानं धनं शिक्षाविभागस्य योगदानरूपेण दातुं शक्यते। अतः सर्वे छात्राः यथाशक्ति धनं दत्वा इमम् उद्यमं विजयपथमानेतु यतन्ताम् इति छात्रान् विद्यालयाधिकारिणः रक्षाकर्तृन् च अभ्यर्थये।

नवदिल्ली- राज्यस्थेषु चतसृषु निजीय वैद्यकीयकलाशालासु प्रवेशार्थं कल्पितं स्थगनं अनुवर्तिष्यते इति सर्वोच्चन्यायालयः। बुधवासराभ्यन्तरे सर्वाः रेखाः समर्पणीयाः इति न्यायालयः कलालयान् निरदिशत्।

निर्णयः तुरं वक्तव्य इति केरलस्य आवश्यं न्यायालयः नाङ्गीचकार। वैद्यकीयसमितेः आवेदनमेव सर्वोच्चन्यायालयस्य परिगणनायामागतम्।

नवदिल्ली- स्ववर्गरतिम् अपराधत्वेन कल्पितः नियमः -ऐ.पी.सी.३७७ ऐतिहासिकविधिना सर्वोच्चन्यायालयेन तिरस्कृतः। जीवनार्थं स्वातन्त्र्यमेव प्रधानमिति निरीक्ष्य़ मुख्यन्यायाधीशस्य दीपक् मिश्रावर्यस्य़ आध्यक्ष्ये पञ्चाङ्गसमितिरेव अयं निर्णयो व्यदधात्। स्ववर्गबन्धः अनुवदनीयः, सर्वाण्यपि पातित्वकल्पनानि नियमविरुद्धानि इति च समित्यङ्गैः ऐककण्ठ्येन निरीक्षितम्। मुख्य़न्यायाधीशेन सह अइ एफ् नरिमान्, ए. एम्. खान्विल्कर्, डी.वै. चन्द्रचूड्, इन्दू मल्होत्रा इत्येतैः न्यायाधीशैः युक्ता विभागसमितिरेव अस्मिन् व्यवहारे वादमशृणोत्।
केनापि स्वकीयव्यक्तित्वात् अपसारयितुं शक्यते, व्यक्तित्वं यत्किमपि प्रकारं भवतु तदङ्गीकर्तुं समाजः सन्नद्ध एव। संविधानानुसारं भन्नलिङ्गानामपि अधिकारः तुल्य एव इति च मुख्यन्यायाधीशः निर्णयप्रस्तावे अवदत्।
२००९ तमे वर्षे दिल्ली उच्चन्यायालयेन स्ववर्गरतिः अपराधो नास्तीति आदेशो दत्तः आसीत्। परन्तु २०१३ तमे वर्षे सर्वोच्चन्यायालये वी.एस् सिङ्ग्वी इति न्यायाधीशः स्ववर्गरतिम् आगस्कारिणीं कल्पितवान्। स एव आदेशः अधुना तिरस्कृतः।