नवदिल्ली-  सर्वोच्चन्यायालयस्य ४६ तमः मुख्यन्यायाधीशः रञ्जन् गोगोय् वर्यः राष्ट्रपतिभवने शपथं गृहीत्वा धुरामवहत्। राष्ट्रपतिः रामनाथकोविन्दवर्यः तस्मै सत्यवाचकं श्रावयति स्म। ह्यस्तने सेवानिवृत्तस्य ज. दीपक् मिश्रावर्यस्य स्थाने एवेदं शपथग्रहणम्।

     असमराज्यस्य भूतपूर्वमुख्यमन्त्रिणः केशवचन्द्र गोगोय् वर्यस्य पुत्रः भवति रञ्जन् गोगोय्। स १९५४ तमे वर्षे जनिमलभत। २००१ तमे वर्षे अयं गुहावती उच्चन्यायालये न्यायाधिपपदमावहत्। ततः पञ्चाब-हरिय़ाणा उच्चन्यायालये न्याय़ाधीशपदवीं वहन्तं तं २०१२ तमे वर्षे सर्वोच्चन्यायालये न्यायाधिपत्वेन नियोजयामास। दीपक् मिश्रावर्यं विरुध्य न्यायाधिपानां प्रक्षोभे एषः अग्रेसरः आसीत्।

केन्द्रसर्वकारः बहूनां योजनानां प्रारम्भः अद्य आयोजितो वर्तते। स्वच्छभारतदौत्यस्य चतुर्थः वार्षिकः अद्य आयोज्यते।
राष्ट्रपितुः जन्मवार्षिकदिवसे ऐक्यराष्ट्रसभा मुख्यसचिवः अन्टोणियो गुटेरस् मुख्यातिथिः भविष्यति। राष्ट्रपतिभवने एव समारोहः राष्ट्रपितुः समर्पणरूपेणैव स्वच्छता हि सेवा अभियानस्य प्रारम्भः।

‘देवरागप्रवीणोयं
बालको बालभास्करः।
तन्त्रीभिः प्रीणयन्नस्मान्
देवपादमुपागतः ‘॥

वि. माधवन् पिल्ला।

तिरुवनन्तपुरम्- यानदुर्घटनायां रुग्णः सन् चिकित्सालये चिकित्सां विदधानः सुप्रसिद्धः वयलिन् वाद्यकारः संगीतनिदेशकश्च बालभास्करवर्यः दिवमगात्। स ४० वयस्कः आसीत्। अद्य प्रातरेवासीत् अस्यान्त्यम्। गते २५ तमे दिनाङ्के यानापघातेन भग्नदेहः निजीयचिकित्सालये प्रवेशितः आसीत्। चिकित्सामध्ये हृदयाघात एव मरणकारणम्।
तृशिवपुरे मन्दिरदर्शनानन्तरं प्रत्यागमनसमये आसीत् यानापघातः। अपघाते तस्य पुत्री द्विवयस्का तेजस्विनी बाला तत्क्षणं मृता आसीत्। अपघाते तस्य पत्नी अपि रुग्णा सती चिकित्सालये अस्ति।

वयलिन् वाद्ये विस्मयमापादितः प्रतिभाधन आसीत् बालभास्करः। बहूनां चलचित्राणां कृते स संगीतनिदेशनं कृतवान्। संस्कृते बिरुदं सम्पादितवानयम्।

नवदिल्ली- भारतस्य नीतिन्यायव्यवस्था विश्वे सर्वशक्ता इति सेवातः निवर्तमानः मुख्यन्यायाधीशः दीपक् मिश्रा वर्यः अवदत्। अतिशायनसंख्याकान् व्यवहारान् प्रचालयितुं शक्ता भवति अस्माकमियं व्यवस्था। सेवातः श्वः निवर्तमानः न्यायाधीशः स्वकीये आपृछने वेदिकायामेवमवदत्। शबरिमलामन्दिरे स्त्रीणां प्रवेशः स्ववर्गलैङ्गिकता आगस्कारिणी नास्तीति निर्णयः इत्यादीन् बहून् व्यवहारनिर्णयान् प्रदाय एव एष वर्यः सेवायाः विरमते।

सत्यस्य पृथक् वर्णं नास्ति सत्येन सह सधैर्यं वर्तिष्य़े इति स अवदत्। दरिद्रस्य सम्पन्नस्य च अश्रूणि समानानि।
जनानां पूर्वचरितं निरीक्ष्य न कदापि मूल्याङ्कनमकरवम्। प्रत्युत तेषां प्रवर्तनानि अवलोक्यैव विधिनिर्णयं कृतम्। इतरराष्ट्रापेक्षया सत्यपथात् भारतीयन्यायाधिपाः न व्यतिचलन्ति इत्यपि दीपक् मिश्रा वर्यः न्यगादीत्।

स्टोक् होम्- वैद्यशास्त्ररंगे महिमानं परिगणय्य नोबल् पुरस्ताराः प्रख्यापिताः। अर्बुदप्रतिरोधाय नूतनचिकित्साम् आयोजितौ जोयिस् पी. आलिसन् इति अमेरिक्का देशीयः तसुक् फ्राञ्चो इति जपानदेशीयश्च एवं पुरस्कृतौ भवतः। अद्य मध्याह्ने त्रिवादने पुरस्कारः प्रख्यापितः।

     अर्बुदं प्रतिरोद्धुं प्रतिरोधकोशेषु निर्णायकस्य प्रोट्टीन् अंशस्य सान्निध्यं प्रत्यवगतम् इत्यतः फ्राङ्को पुरस्कृतः। तत्सम्बन्धस्य विशेषपठनस्य कृते आनिसण् वर्यः अपि पुरस्कृतः।

कोषिक्कोट् – डीजल् इन्धनस्य मूल्यवर्धनकारणात् राज्ये २५०० परिमितानि निजीय लोकयानानि सेवातः प्रत्यावर्तन्ते। एतदर्थम् आवेदनानी यानस्वामिनः गतागताधिकारिणं प्रेषितवन्तः
डीजल् मूल्यम् अनियन्त्रितरूपेण वर्धन्ते। अतः राज्ये निजीयबस् यानोद्योगस्य प्रतिकूलावस्था सञ्जाता। यात्राशल्कपरिवर्तनानन्तरं डीजल् मूल्य १५ रूप्यकाणां वर्धनमभवत्। अनेन बस्यानस्य सेवां सञ्चालयितुं स्वामिनः महान् कष्टमनुभवन्ति। अत एव तेषां संघनेतृणां सूचनां विनापि सेवास्थगननिर्णयं तैः स्वीकृतम्।

सुलवोसि- इन्तोनेष्या द्वीपसमूहे सञ्जाते अतिशक्ते भूचलने सुनामी नाम ऊर्म्यां च संलग्नाः ३० जनाः मृताः बहवः आहताश्च। रिक्टर् मापिन्यां ७.७ तीव्रताम् अङ्कितस्य भूचलनस्य पश्चादेव सुनामी सञ्जाता।

     इन्तोनेष्यायाः सुलवोसी द्वीपे एवेयं दुर्घटना जाता। भारतीयसमयानुसारं सायं ३.३० वादने एवायं दनरन्तः। द्विमीट्टर् परिमिते औन्नत्ये सागरतः ऊर्मीः तीरं प्रति आगताः इति दृक्साक्षिणः वदन्ति।

    भग्नेभ्यः गृहेभ्यः सुरक्षितस्थानं प्रति परिवर्तनाय जनेभ्यो निर्देशमदात्। भूतलनकारणात् पुलु विमानपत्तनं पिहितम्ऎ.

नवदिल्ली- शबरिमलायां स्त्रीणां प्रवेशः निरोद्धुं न श्क्यते इति सर्वोच्चन्यायालयस्य विधिप्रस्तावः। अनेन बहुकालस्य विवादस्य विरामो जातः। भूरिपक्षाभिप्रायेण अयं विधिप्रस्तावो जातः। न्यायाधिपेषु एका स्वविरुद्धतां प्राकटयत्।

न्यायालयस्य निर्णयः अङ्गीकरिष्यति इति शबरिमला तन्त्रिवर्यः प्रावोचत्। वयोभेदं विना सर्वासां स्त्रीणां मन्दिरप्रवेशः अनेन साध्यो भविता। इमं निर्णय़ं विरुद्ध्य कानिचन दलानि प्रक्षोभमारब्धवन्तः।

कोच्ची- अस्मिन् वर्षे बालामणियम्मा पुरस्कारः श्रीकुमारन्  तम्पी वर्याय। प्रसिद्धः कविः गानकारश्च भवति अयं महाभागः। ५०००१ रूप्यकाणि प्रशस्तिपत्रं च पुरस्कारे अन्तर्भवतः। कैरलीसाहित्यरंगे समग्रं योगदानम् अभिलक्ष्यैवायं पुरस्कारः।

     सी. राधाकृष्णः. के.एल्. मोहनवर्मा, एस्. रमेशन् नायर् के. राधाकृष्णः इत्येतैः युक्ता समितिरेव पुरस्कारविजेतारं निरणयत्। नवम्बर् ८ दिनाङ्के सम्पत्स्यमाने अन्ताराष्ट्र- पुस्तकोत्सवे पुरस्कारसमर्पणं भविता। पूर्वं चलचित्ररंगस्य समग्रयोगदानमभिलक्ष्य जे. सी. डानियेल् पुरस्कारो/पि अनेनैव प्राप्तः।

     ५० वर्षाणि यावत् मलयालचलचित्ररंगे सजीवं सान्निध्यं भवति श्रीकुमारन् तम्पी वर्यः। ७८ चलचित्राणां कृते अनेन पटकथा लिखिता। १९७१ तथा २०११ वर्षयोः श्रेष्ठः गानकारः इति पुरस्कारमपि अयमेव अलभत।

तिरुवनन्तपुरम्- केरला आन्ताराष्ट्र चलचित्रोत्सवं व्ययं न्यूनीकृत्य आयोजयितुं सर्वकारस्य निर्णयः। सर्वकारस्य साहाय्यं विना उत्सवसञ्चालनायैव सर्वकारः अनुमतिम् अदात्। चलचित्र अक्कादमी प्रतिनिधिभिः सह मुख्यमन्त्रिणा कृते वार्तालापे एवायं निर्णयः।

     चलचित्रोत्सवार्थं सर्वकारः धनं न दास्यति। अक्कादमी स्वप्रयत्नेन आवश्यरं धनमार्जयतु। विशिष्टातिथीनाम् आमन्त्रणं न्यूनीकरणीयम्। प्रवेशशुल्कम् उन्नीय धनमार्जयितुमपि आलोचना अस्ति।

     प्रलयस्य पश्चात्तले ऐषमं चलचित्रोत्सवं विहातुं पूर्वं निर्णयमासीत्। परन्तु अयमुत्सवः अवश्यं सञ्चालनीयः इति एतन्मण्डलीयानाम् प्रार्थना सर्वकारेण अधुना अङ्गीकृता।