तिरुवनन्तपुरम्- केरलराज्ये कोविड् प्रतिरोधप्रवर्तनाय धनं समाहर्तुं सार्वकारीयकर्मकराणां वेतनं गृहीष्यति। षड्दिवसीयं वेतनं पञ्चसु मासेषु क्रमशः स्वीकर्तुं मन्त्रिमण्डलस्य निर्णयः। यदा आर्थिकस्थितिः भद्रा भवति तदा स्वीकृतं वेतनांशं प्रतिददाति इति व्यवस्था च आयोज्यते। स्वास्थ्यविभागीयानां रक्षिदलीयानां च न कोपि आश्वासः विद्यते, परं प्रतिमासं २०००० रूप्यकेभ्यो न्यूनं वेतनं स्वीकुर्वन्तः कर्मकराः अर्धसमयकर्मकराश्च स्वेच्छया वेतनं दातुं प्रभवन्ति।

कर्मकराणाम् एकमासीयं वेतनं अनेन लभ्यते। मन्त्रिणां सामाजिकानां निगमाध्यक्षाणां च वेतनं त्रिंशत् प्रतिशतमिति रीत्या एकवर्षं यावत् गृहीतुमपि निर्णयः अस्ति।

राज्ये कोविड् व्यापनस्थितिः आशावहा नास्तीति मन्त्रिमण्डले विचारितम्। अतः जनैः जागरूकैः भाव्यमिति उद्घोषणा दत्ता।

तिरुवनन्तपुरम्- अस्मिन् वर्षे एस्.एस्.एल्.सी. परीक्षायां शिष्टविषयाणां परीक्षा मेय् तृतीयवारे सम्पत्स्यते। शिक्षाविभागः अस्याः साध्यतां निरीक्षते। कोविड्रोगव्यापनस्य तीव्रता न्यूना जाता, सप्तसु मण्डलेषु पिधानव्यवस्थायाम् ईषद् आश्वासश्च घोषितः। अस्मिन् सन्दर्भे एव परीक्षाचालनस्य साध्यतां निरीक्षते।

अस्मिन्नन्तरे केवलं केरलीय साहचर्यस्य आनुकूल्येन परीक्षाचालनं न शक्यम्। लक्षद्वीपे मध्यपूर्वीय अरब् राष्ट्रेषु च केरलीयविद्यालयाः सन्ति। तेषां साहचर्यं च अवलोक्य अन्तिमनिर्णयं भविता।

एस्.एस्.एल्.सी. प्लस्-टु परीक्षाः शीघ्रं समायोज्य़ छात्राणाम् उन्नतशिक्षायै अवसरसमायोजनमेव सर्वकारस्य कर्तव्यम्।

तिरुवनन्तपुरम्- विदेशात् प्रवासिनः प्रत्यानेतुं साहचर्यमस्ति चेत् द्विलक्षं जनान् सम्पर्कनिरोधे वासयितुं व्यवस्था कृता इति मुख्यमन्त्री पिणरायि विजयन् वर्यः। इतोप्यधिरमस्ति चेदपि तान् स्वीकर्तुं तथा सुरक्षितरूपेण वासयितुं पद्धतिः सज्जा भवति इत्यपि वार्ताहरमेलने स अवदत्।

केन्द्रसर्वकारः पृथक् विमानं आयोजयति चेत् स्थविराः, अन्तर्वत्न्यः, कोविडितररोगेभ्यः चिकित्सामिच्छन्तः इत्येतान् प्रथमं प्रत्यानेतुं यतते। प्रवासिनाम् आगमने तान् सम्पर्कनिरोधं कृत्वा अन्ते स्वगृहं प्रापयितुमपि राज्यसर्वकारः सज्जः भवति। प्रवासिसंघटनानां साहाय्यम् अस्मिन् विषये भविष्यति इत्यपि मुख्यमन्त्री अवदत्।

वाषिङ्टण्- कोविड् बाधानन्तरम् अपचयमाप्तस्य कार्षिकरंगस्य सहयोगार्थम् अमेरिका अध्यक्षः डोनाल्ड् ट्रम्प् वर्यः १९ निखर्वं आर्थिकनिचयं प्राख्यापयत्। शुक्रवासरे सम्पन्ने वार्ताहरसम्मेलने एव ट्रम्पस्य प्रख्यापनम्।

महामारिकारणात् दुरितमनुभूयमानानां कृषकाणां कृते साहाय्यं प्रत्यक्षतया दातुमेवायमुद्यमः।

विद्यालयानां भोजनालयानां च पिधानेन कृषकाः महान्तं नष्टमन्वभवत्। कार्षिकोत्पन्नानां चोदना न्यूनीकृता। अतः उत्पन्नानां नाशः सम्भूतः। कृषकेभ्यः उत्पन्नानि सर्वकारः क्रीणीय सामाजिक भक्ष्यशृङ्खलाद्वारा समान्यजेभ्यः वितरिष्यति।

तिरुवनन्तपुरम्- कोविड्-१९ रोगस्य व्यापनं न्यूनतया अनुभूतानि आलप्पुषा, तिपुवनन्तपुरम्, पालक्काट्, तृशूर्, वयनाट् मण्डलानि तृतीयमेखलारूपेण परिगणय्य तत्र साधारणजीवनं भागिकतया पुनःस्थापनमेव सर्वकारस्य लक्ष्यमिति मुख्यमन्त्री पिणरायि विजयन् वर्यः अवदत्।

अधुना आलप्पुषजिल्लायां त्रयः, तिरुवनन्तपुरे द्वौ, पालक्काट् त्रयः तृशूर् एकः वयनाट् च एकः इति क्रमेण जनाः कोविड् बाधिताः सन्ति। केन्द्रसर्वकारेण दीप्तबिन्दुतया आङ्कितं तिरुवनन्तपुरं मण्डलमपि अस्मिन्नन्तर्भवति। तिरुवनन्तपुरं मण्डलं तृतीयगणे परिगणयितुम् आवेदनं प्रेषितमिति मुख्यमन्त्री अवदत्।

यद्यपि साधारणजीवितम् अनुमिनोति तथापि नियन्त्रणानि सर्वाणि एतेषां मण्जलानामपि बाधकानि भवेयुः। चलचित्रशालाः आराधनालयाश्च पिहिताः एव स्युः।

नवदिल्ली > कोविड् १९ रोगस्य पूर्णनिर्माजनं उद्दिश्य सम्पूर्णं पिधानं मेय् ३ दिनाङ्कपर्यन्तम् आयामितमिति प्रधानमन्त्रिणा नरेन्द्रमोदिना प्रतिपादितम्। गतदिने राज्यमुख्यमन्त्रिभिः साकम् अधिजालम् आयोजिते संवेशने स्वीकृतं निर्णयमनुसृत्यैव प्रधानमन्त्रिणः प्रख्यापनम्। सम्पूर्णपिधानस्य प्रथमसोपानम् अद्य अवसीयमानम् असीत्। तदनुसारं राष्ट्रम् अभिसम्बोधयन् भाषमाणः आसीत् प्रधानमन्त्री।

     कोरोणाविषाणुप्रतिरोधे युद्धमुखे इव स्वकर्तव्यम् अनुतिष्ठवतः सर्वान् प्रधानमन्त्री अभ्यवादयत्। किन्तु आगामिसप्ताहः अतीवनिर्णायकः इति प्रधानमन्त्रिणा सूचितम्।

     तीव्रबाधितमण्डलेषु कर्कशं नियन्त्रणमावश्यकम् । कतिपयेषु अवश्यसेवनमण्डलेषु एप्रिल् २० दिनाङ्कात् केचन आश्वासप्रक्रमाः भविष्यन्तीति सूचना अस्ति। तदर्थं मानदण्डनिर्देशः श्वः सूचयिष्यति। कोविड् प्रतिरोधाय प्रधानमन्त्री सप्तांशु निर्देशान् अदात्।

नदिल्ली- पिधानकाले कृषकाणां समाश्वासाय कृषि उडान् पद्धतिद्वारा विमानसेवा आयोज्यते। भारते उत्पादितानि फलानि शाकानि च एयर् इन्ड्या विमानद्वारा यूरोप् राष्ट्रं प्रापयिष्यति। कृषकाणां साहाय्यार्थमेव इयं व्यवस्था एयर् इन्ड्या संस्थया स्वीकृता। लण्टन्, शर्मणीराष्ट्रस्थं फ्राङ्क्फर्ट्  इत्यादीन् देशान् प्रति एव फलैः शाकादिभिश्च साकं विमानानी उड्डयन्ति।

     एप्रिल् १४ तिथौ लण्डन् प्रति १५ तिथौ फ्राङ्कफर्ट् प्रति च विमानसेवा। प्रत्यागमनसमये वैद्यकीयवस्तूनि ततः आनीयन्ते। राष्ट्रे कार्षिकोत्पन्नानि विदेशराष्ट्राणि नेतुं केन्द्रसर्वकारैः आविष्कृता पद्धतिः भवति उडान्।

तिरुवनन्तपुरम्- राज्ये सार्वजनीनविद्यालयस्थाः सर्वे अध्यापकाः छात्रान् दूरवाणीद्वारा आहूय तेषु आत्मविश्वासं विवर्धेरन् इति शिक्षामन्त्री प्रोफ. सी. रवीन्द्रनाथवर्यः निरदिशत्।

यदा नियन्त्रणानि अवसीयन्ते तदा एस्.एस्.एल्.सी., प्लस्-टु परीक्षाः प्रचलिष्यन्ति। कोविड् प्रतिरोधयज्ञे वयं यदा विजयिनो भवामः तदैव परीक्षा प्रारभ्स्यते। जूण् प्रथमे दिनाङ्के विद्यालयेषु अध्ययनप्रारम्भः भविष्यति इति प्रतीक्षा अस्ति। यदि न शक्यते तर्हि पाठ्यपद्धत्यनुसारं सर्वान् पाठभागान् अध्यापयितुं सुविधा केरलेषु वर्तते। अष्टमकक्ष्यापर्यन्तं पाठपुस्तकानि वितरणकेन्द्रेषु प्रापितानि। शिष्टानि यानसौविध्यमनुसृत्य अचिरेणैव प्रापयिष्यति।

परीक्षाः अधिजालिकरीत्या प्रचालयितुं व्यवस्था अस्ति। साम्प्रदायिकरीत्या परीक्षा नियन्त्रणात्यये एव स्यात्।

प्राथमिकस्तरीयाः छात्राः समग्रा इति अधिजालिकव्यवस्थामुपयुज्य क्रीडा पठनं च समारभन्ताम् इत्यपि मन्त्री अवदत्।

तिरुवनन्तपुरम्- विद्यालयानाम् अप्रतीक्षिते विरामे घोषिते विरामकाले गृहे एव स्थातुं निर्दिष्टानां छात्राणां स्वास्थ्य-क्रीडावीनोद-सृजनात्मकादीनां शेषीणां परिपोषणार्थं राज्य शैक्षिकानुसन्धानप्रशिक्षणपरिषदः आध्यक्ष्ये कैट् संस्थायाः तान्त्रिकसहयोगेन अधिजालिकप्रशिक्षणपद्धतिः समारब्धा।
विरामकालीनसन्तोषाः इति अधिजालिकप्रशिक्षणपद्धतेः भागत्वेन प्रत्येकं प्रवर्तनं छात्राः गृहे एव तिष्ठन्तः प्रशिक्षितुं पारयन्ति। *एक्सर्सैस् अट् होम्* इति नाम्ना व्यायामपद्धतिरपि अस्मिन्नन्तर्भवति। समग्र पोर्टल् मध्ये एव एते विभवाः सन्ति। एतत्सम्बन्धीनि ह्रस्वचलनचित्राणि पोर्टल् मध्ये अधिरोपितानि। क्रीडाक्षमतां प्रतिरोधशक्तिं च परिवर्धयितुं जीवितशैलीरोगान् प्रतिरोद्धुं च चलनचित्राणां निर्देशानुसारं प्रवर्तनं कर्तुं शक्यते।
तद्वत् विविधानां कलारूपाणां विवरणमपि आयोजितं वर्तते। संरम्भोयं छात्राणां आस्वाद्यकरं नूतनानुभवं प्रदास्यति इति एस्.सी.इ.आर्.टी. निदेशकः डो. जे. प्रसाद् वर्यः अवदत्।

https://samagra.kite.kerala.gov.in/home/page

एरणाकुलम्- विख्यातः चलचित्रसंगीतनिदेशकः एम्.के. अर्जुनन् वर्यः कालकबलितः अभवत्। कोच्ची पल्लुरुत्ती स्थले स्वकीये गृहे प्रातः 3.30 वादने आसीत् मृत्युः। स 84 वयस्कः आसीत्।

     700 अधिकानां चलच्चित्राणां नाटकानां च कृते स संगीतं व्यदधात्। 2017 तमे वर्षे भयानकम् इति चलच्चित्रस्य संगीतायोजनद्वारा राज्यसर्वकारस्य पुरस्कारः अनेन प्राप्तः।

     विख्यातगायकस्य येशुदासस्य शब्दः प्रथमतया अस्य महात्मनः निदेशत्वे एव मुद्रितः आसीत्। एवमेव ए.आर्. रह्मान् वर्यस्य चलचित्रसंगीतरंगप्रवेशः अपि अर्दुनन् मास्टर् द्वारा आसीत्।