जपानीय वंशजः ब्रिटीष् नोवल्(आख्यायिका)कारश्च कासुवो इषिगुरो वर्यः साहित्यविभागे नोबल् पुरस्काराय चयितः।द रिमेयिन्स् आफ् द डे प्रभृतयः बहवः आख्यायिकाः तथा लघुकथाश्च अनेन रचिताः।बहूनां चलचित्राणां कृते पटकथा अपि अनेनैव रचिताः।१९८९ तमे वर्षे अयं बुक्कर् पुरस्कारेण मानितः आसीत्।पूर्वं चतुर्वारं अस्मै पुरस्काराय तस्य नामनिर्देशःसंजातः परं अस्मिन् वर्षे एव अत्युन्नतेन एतेन पुरस्कारेण अयं सम्मानितः अभवत्। १९५४ तमे वर्षे जपाने नागसाक्कि स्थले अयं लब्दजन्मा अभवत्।

नवदिल्ली- राष्ट्रस्य आर्थिकविकासमानम् अधोगतिं प्राप्नोतीति प्रधानमन्त्रिणा अङ्गीकृतम्। आर्थिकवर्षस्य एप्रिल्-जूण् पादे विकासमानं न्यूनमभवत्। विकासस्य प्रत्यानयनाय सर्वकारः प्रतिज्ञाबद्धः इति स अब्रवीत्। क्रमशः वर्षत्रयं ७.५ शतमितम् आर्थिकविकासं वयं सम्पादितवन्तः। परन्तु एप्रिल्-जूण् पादे विकासस्य न्यूनता अभवत्। स एव विकासः प्रत्यानयनीयः इत्यपि सः अवदत्। नवदिल्यां ऐ.सी.एस्.ऐ. सुवर्णजयन्ती समारोहे भाषमाणः आसीत् सः। रिजर्व बैङ्क् अधिकारिणः एतत्सम्बन्धि प्रस्तावस्य पश्चादासीत् प्रधानमन्त्रिणः इयं प्रस्तावना।

नवदिल्ली – शिलातैल-डीसल्तैलयोर्मूल्यं गतनिशीयाद् न्यूनतां गतम्। अन्ताराष्ट्रीयविपणौ असंस्कृत-तैलमूल्ये सहसा अपचितिमालक्ष्य प्रशासनेन उभयोस्तैलयोः उत्पादशुल्के रूप्यकद्वयस्य नैयून्यं घोषितम्।

लास् वेगस् – अमेरिकायां लास् वागस-स्थे संगीतकार्यक्रमे ह्यो दुरापादिते भीषणे गोलिकावर्षणे न्यूनान्न्यूनाः ऊनषष्टिर्जनाः मृताः, सप्तविशत्यधिकाः पञ्चशतं च क्षताः संजाताः सूच्यन्ते। कश्चन आतङ्कवादी मुक्ताकाशे प्रवर्तमाने संगीतकार्यक्रमे समवेतान् जनान् लक्षीकृत्य सहसा अविरलं गोलिकावर्षणम् आरब्धवान्।

कोच्ची- कोच्ची मेट्रो योजनायाः द्वितीयश्रेणी पालारिवट्टं प्रदेशात् महाराजकलाशाला पर्यन्तं भागः यात्रायै सुसज्जः अभवत्। अस्योद्घाटनम् अद्य प्रातः १०.३० वादने मुख्यमन्त्री श्री पिणरायि विजयः निर्वक्ष्यति। केन्द्रमन्त्री श्री हर्दीप् सिंह पुरी वर्यः, विपक्षदलनेता  रमेश् चेन्नित्तला,  मन्त्रिणः     नियमसभासामाजिकाः महानगरसभाध्यक्षप्रभृतयः सन्निहिताः भविष्यन्ति। जेवहर् लाल् नेह्रु क्रीडाङ्गणे उद्धाटनकार्य़क्रमः अयोजितः।

लण्टन्-

विश्वशान्तिविषये नोबल् पुरस्कारेण समादृतायाः ओङ् सान् स्यूची महाभागायाः छायाचित्रं विश्वप्रसिद्धात् ओक्स्फोर्ट् विश्वविद्यालयात् निष्कासितम्। लण्टन् नगरस्थस्य विश्वविद्यालयस्य सेन्ट् ह्यूग्स् कलाशालायाः मुख्यद्वारे एव चित्रं प्रदर्शितमासीत्। इदानीं तत्र जपानीय कलाकारस्य योषिहिरो तगाटस्य चित्रमेव प्रदर्शितम्। रोहिङ्ग्या विषयः आगोलतले स्यूचीं विरुद्ध्य प्रतिषेधस्य कारणमासीत्। तस्मिन्नन्तरे एव विश्विद्यालयाधिकारिणां प्रवृत्तिः।

मुम्बै-अक्तूबर् १.

देशस्नेहम्  अस्मान् न पाठयेयुः इति भा.ज.पा. दलं स्मारयन् शिवसेनाध्यक्षस्य उद्धव ताक्करे महाशयस्य प्रस्तावः। राष्ट्रस्य आर्थिकावस्थां सूचयन् पूर्वमेव स भाषते स्म। मुद्रानिरोधस्य प्रतिकूलिनः देशद्रोहिणः, अनुकूलिनः देशस्नेहिनश्चेति अवस्था अधुना प्रतिभाति इत्यपि भा.ज.पा. दलं विमर्शय् स अभाषत।

नवदिल्ली – रेयिलमन्त्री पीयूषगोयलः देशे रयिलसेतूनां सविशेषे सन्दर्भे रेयिल-यात्रिकाणां सुरक्षां सुनिश्चेतुं नैकान् उपायान् समुद्घोषितवान्। तेन यात्रिसुरक्षायाः मन्त्रणो∫यं विगतदिवसेषु मुम्बय्यां दुरापन्ने भीषणसेतुभ्रंशे त्रयोविंशतिजनानां मृत्युमभिलक्ष्य विशिष्टं महत्वमादधाति।

नवदिल्ली – रेलमन्त्री पीयुषगोयलः अब्रवीत् यत् रेलयात्रां भूयो∫पि सुरक्षान्वितां विधातुं सुरक्षोपायानाम् अन्वेषणार्थं रेलविभागः अन्तरीक्षानुसन्धानसंघटनेन सह संभूय कार्यमाचरति। श्री गोयलः व्याहरत् यदसौ विषये∫स्मिन् कतिपयदिवसपूर्वं भारतीयान्तरीक्षानुसन्धानसंघटनस्य अध्यक्षं ए.एस् किरणकुमारम् अमिलत्।

नवदिल्ली – २०१७ वर्षान्त्येन दूरदर्शनस्य भौमसम्प्रेषणं समाप्तिम् एष्यति। शुक्रवासरे प्रवृत्ते प्रसार् भारती संसंथायाः उन्नते अधिवेशने अयं निर्णयः जातः। पूर्वम् एतदर्थं पर्यालोचना प्रवृत्ता तथापि निर्णयो न जातः। अधुना ट्विट्टर् माध्यमेन प्रसार् भारती अधिकृतैः एष निर्णयः प्रकाशितः। भौमसम्प्रेषणस्य प्रेक्षकाणां न्यूनता तथा राष्ट्रस्य विविधभागस्थानां सम्प्रेषणस्तूपानां परिपालनाय अधिकव्ययश्च एतस्य निर्णयस्य हेतुः। राष्ट्रे १४१२ भौमस्तूपाः इतःपर्यन्तं प्रसार् भारती संस्थया स्थापिताः।