कोच्ची- केरलोच्चन्यायालयस्य मुख्यन्यायाधीशत्वेन आन्टणी डोमनिक् वर्यः शपथमकरोत्। राजभवने आयोजिते समारोहे राज्यपालः ज.पी.सदाशिवं वर्यः सत्यवाचकेन सह शपथमकारयत्। मुख्यमन्त्री पिणरायि विजयः मन्त्रिणः उच्चन्यायालयस्थाः न्यायाधिपाश्च सन्निहिताः आसन्। कार्यकर्तृमुख्यन्यायाधिशत्वेन कर्म कुर्वन्तं डोमनिक्वर्यं गतदिने मुख्यन्यायाधीशरुपेण नियोज्य राष्ट्रपतिना विज्ञापनं कृतमासीत्। सप्तदशवर्षानन्तरमेव कश्चन केरलीयः केरले मुख्यन्यायाधीशो भवति।